Cluster Audiovisual Galego

“Rapa”, a nova serie de suspense de Portocabo para Movistar+

14-07-2021

Pepe Coira e Fran Araújo son os creadores da serie “Rapa”, que dirixirá Jorge Coira, con Alfonso Blanco na produción executiva. Producida pola nosa asociada Portocabo, estará composta de seis episodios de 50 minutos, cuxa rodaxe arrancará este mes de setembro en Galicia, con vistas ao seu lanzamento en 2022 na plataforma Movistar+.

“Rapa” está protagonizada por Javier Cámara. O actor interpretará á única testemuña do asasinato da alcaldesa dunha vila galega. A serie estrearase en 2022 e aínda non deu a coñecer que outros actores comporán o seu elenco.

En declaracións de Pepe Coira e Fran Araújo, “‘Rapa’ é un thriller. É a historia dun crime, e das razóns polas que alguén mata e polas que alguén investiga. É unha historia que reúne a unha serie de personaxes que nos atraía coñecer: o profesor frustrado que sente como un estímulo ter sido testemuña dun asasinato; a sarxento da xudicial que está no seu territorio cando vai á caza do culpable; os homes e mulleres involucrados, un grupo humano no que non é fácil distinguir quen é culpable e quen vítima.

Pensamos a historia para un lugar máxico, onde se mesturan mar e terra, vento e calma, o territorio que vai desde a serra da Capelada, na costa atlántica, ata Ferrol. Un lugar onde todo pode cambiar á volta de cada esquina”.

Sinopse de “Rapa'”

A Capelada. Unha terra antiga, de altos acantilados sobre o mar, onde os cabalos viven libres. Salvo un día: o da rapa das bestas. A rapa é unha tradición que sintetiza o belo e o salvaxe dun territorio polo xeral tranquilo, pero que vai ser escenario dun crime. Buscar ao asasino de Amparo Seoane, a alcaldesa da localidade, será o obxectivo común de Tomás –profesor frustrado– e Maite, unha sarxento da garda civil. E  converterase nalgo máis: unha boa razón para vivir.