Cluster Audiovisual Galego

Noticias del Clúster

Produtores de toda España buscan acordos comerciais para os seus proxectos no pitching “I+P, Ideas para Producir”

A Coruña foi o escenario este venres da celebración da 16ª edición do pitching “I+P, Ideas para Producir” na que participaron máis dun centenar de profesionais do audiovisual de toda España. 

O “I+P, Ideas para Producir”, organizado polo Clúster Audiovisual Galego, conecta proxectos audiovisuais en distintas fases de desenvolvemento con canles de televisión, produtoras e distribuidoras de primeiro nivel e ten como obxectivo favorecer acordos comerciais para a produción ou a venda de novos proxectos. 

A alcaldesa da Coruña, Inés Rey, participou no acto de clausura do evento, onde dixo que iniciativas como esta son necesarias para o desenvolvemento de proxectos audiovisuais, e destacou  aposta que fai a súa cidade pola cultura e o cine, citando algunhas das actividades desenvoltas na Coruña arredor do mundo cultural e audiovisual.  

A alcaldesa tamén sinalou que "a cidade e a provincia da Coruña albergan aproximadamente a metade das empresas galegas do sector, o cal é un motor económico para a comunidade, de aí a necesidade de que as administracións o apoien”, dixo. 

Durante o acto anunciou aos asistentes que A Coruña acollerá un dos maiores estudios virtuais de produción audiovisual de España. Este espazo contará co equipamento necesario para que as produtoras galegas non teñan que desprazarse a Madrid ou Barcelona para realizar parte dos seus proxectos. Este novo espazo contará cun presuposto de 6,7 millóns de euros: 5 millóns financiados a cargo do Plan de Recuperación do Goberno de España a través dos fondos Next Generation, e 1,7 millóns con fondos propios da Deputación da Coruña. O proxecto, promovido polo Clúster Audiovisual Galego, suporá un posicionamento estratéxico de Galicia dentro do Plan 'España, Hub audiovisual de Europa', destinado a transformar o ecosistema audiovisual do país. 

A apertura da xornada correu a cargo do presidente do Clúster Audiovisual Galego, Jorge Algora, e da coordinadora do Departamento de Política Audiovisual da Xunta de Galicia, Dolores Meijomín. Algora destacou a utilidade desta xornada de pitchs e reunións de negocio como plataforma de impulso e materialización de novos proxectos de cine e televisión.  

O presidente do Clúster tamén aproveitou a ocasión para agradecerlles aos colaboradores da presente edición o seu compromiso co formato. 

Pola súa banda, a representante da Xunta indicou que o I+P converteuse nun punto de encontro de referencia para o sector e destacou o nivel dos executivos que acuden como potenciais compradores a este encontro.  

También se refiriu á decidida aposta que desde a Administración autonómica se fai polo desenvolvemento de proxectos audiovisuais galegos, refiríndose á liña de axudas específicas coa que conta esta comunidade, e tamén quixo destacar unha segunda liña de apoio destinada á atracción de rodaxes.  

Durante toda a mañá os responsables dos 17 proxectos participantes presentaron, no Centro Ágora coruñés, e en intervencións de dez minutos, os seus traballos diante dunha vintena de executivos do audiovisual que asisten desde onte ao “I+P, Ideas para producir” na Coruña. 

O panel de expertos da presente edición estivo conformado por Maite López Pisonero, subdirectora de Cine de RTVE; Gemma Vidal, produtora executiva de Atresmedia Cine; Lucía Alonso-Allende, subdirectora de Ficción de Atresmedia TV; Jorge Tuca, director da Área de Desenvolvemento de Proxectos de Telecinco Cinema; Carmen Socías, xefa de Análise de Guión no Departamento de Ficción de Mediaset España, Lara López, do departamento de Compras de Dereitos Audiovisuais de Cine Español e Independente, e Ana Diez e Alba Menor, executivas de Desenvolvemento de Series Orixinais, de Movistar Plus+; Pilar de las Casas, vicepresidenta da área de Ficción en AMC Networks Southern Europe; Fernando R. Ojea, director de Contidos de CRTVG, e Montse Besada, xefa do Servizo de Contidos de TVG; Esther Dueñas, produtora executiva no Departamento de Cine e Ficción de TV3; Natalia Martínez, directora de Contidos de Aragón TV; Andrés Longares, xefe de Produción Local de Warner Bros. Discovery; Inmaculada Castaño, delegada en Galicia de Filmax; Fernando Riera, responsable de Distribución de Cine Español e Coproducións de A Contracorriente Films; Nerea Bautista, responsable de Desenvolvemento de Contidos e Series de Ficción de DeAPlaneta; Tony Albert, CEO de Motion Pictures Entertainment, ou Carlota Dans, do Departamento de Contidos de Portocabo. 

Proxectos participantes 

Do total de traballos presentados seis correspóndense cos proxectos que participaron na primeira edición da incubadora I+P, INCUBA posta en marcha polo Clúster coa financiación do ICAA (Instituto da Cinematografía e das Artes Audiovisuais do Ministerio de Cultura) dentro do marco do Plan de Recuperación, Transformación e Resiliencia financiado con Fondos Europeos Next Generation EU.  

Estes seis títulos son as longametraxes de ficción “Sonámbulo”, de Vaca Films, e “As defensas”, de Cósmica Producións; a longametraxe documental “Juliette y Camille”, de Sétima; as series de ficción “Nexo”, de Voz Audiovisual, e “Una de bravas”, de Kaboga art & films, e a serie de animación “Cebra con lunares”, de Sygnatia. 

Completan o total de proxectos presentados, as longametraxes de ficción “Para Ver O Mar”, de TEX45 Producións; “Azul 91”, de Norte Catro Cinema; “Singular”, de White Leaf Producciones; “Balazos y Palomitas”, de Eva Vázquez; “Bou Eva”, de Visioners Entertainment, e “Marma Rabbit Boy”, de CSC Films. Tamén as miniseries de ficción “Normal”, de Lidia Fraga; “El Perdón”, de Corte y Confección de Películas; “El rastro del Arropiero”, de Héctor Escandell, e as series documentais “Rebaño”, de Producións A Fonsagrada (Filmax) e “Paixón”, de Avendaño Estudio. 

Máis de 200 encontros de negocios 

O “I+P, Ideas para Producir” proseguiu pola tarde coa celebración de máis de 200 encontros bilaterais onde os responsables dos proxectos e os executivos poideron intercambiar impresións, ampliar a información dos traballos expostos pola mañá e establecer posibles contactos comercias.  

Este ano o “I+P, Ideas para Producir” contou co apoio da Xunta de Galicia – Xacobeo 21-22, e a través da Axencia Galega das Industrias Culturais (AGADIC) e do Instituto Galego de Promoción Económica (Igape). Coa colaboración do Concello da Coruña, AGAG, CREA, da plataforma Filmarket Hub e do Máster en Produción Xornalística e Audiovisual (MPXA); e co patrocinio de Music Library & SFX, Cinetools, Gadisa e Galicia Calidade.


Co apoio de:


Galicia contará cun dos maiores platós virtuais de España

Galicia terá un dos maiores estudios virtuais de produción audiovisual de España. Este proxecto busca consolidar a capacidade de adaptación tecnolóxica e a resposta da comunidade á revolución mundial que está experimentando este sector. 

A Cidade das TIC da Coruña é o emprazamento elixido para este pioneiro espazo especializado en produción audiovisual virtual, co obxectivo de "crear sinerxías co sector tecnolóxico, xa que aí encóntrase boa parte do talento dixital que innegablemente vai necesitar ao sector audiovisual nun futuro moi próximo". A Deputación provincial construirá alí unha nova nave para o seu uso polo sector audiovisual galego, que contará cun estudio virtual de produción audiovisual pioneiro en España. 

O presidente da Deputación da Coruña, Valentín González Formoso, compareceu este venres en rolda de prensa, xunto á alcaldesa da cidade, Inés Rey; o reitor da Universidade da Coruña (UDC), Julio Abalde; o delegado do Goberno en Galicia, José Miñones, e o presidente do Clúster Audiovisual Galego, Jorge Algora, para confirmar que a Deputación conseguira obter financiación europea para executar este ambicioso proxecto. 

Este proxecto de ecosistema dixital no sector audiovisual galego (Edaga), promovido polo Clúster Audiovisual Galego e presentado pola Deputación da Coruña, conta cun presuposto de 6,7 millóns de euros, dos cales 5 millóns serán financiados polo Ministerio de Economía, a cargo do Plan de Recuperación do Goberno de España, a través dos fondos Next Generation da Unión Europea, y 1,7 millóns con fondos da Deputación da Coruña

O Clúster Audiovisual encontrou na convocatoria de axudas estatais unha oportunidade para desenvolver o seu proxecto e puxo o foco na Cidade das TIC, o parque empresarial impulsado pola UDC e o Clúster TIC de Galicia na antiga fábrica de armas, segundo explicou Jorge Algora. A continuación, contactou coa Deputación Provincial, que se implicou na iniciativa e aporta fondos.  

As empresas do ramo poderán contar no futuro nestas instalacións cun espazo no que poñer en práctica os seus proxectos mediante o uso de tecnoloxías avanzadas e a utilización dese plató envolvente. Este tipo de estudio inmersivo será pioneiro en Galicia. Trátase dunha pantalla led xigante de alta definición que permitirá gravar aos personaxes de diferentes producións audiovisuais fóra do seu espazo natural, segundo explicou o presidente do clúster audiovisual. Algora tamén asegurou que esta nova infraestrutura fará máis competitivo ao sector audiovisual galego. 

Está previsto que a construción da nova nave se licite no primeiro trimestre do próximo ano coa intención de que estea finalizada a finais de 2023. Esta infraestrutura estará dedicada por completo ao sector audiovisual e unha parte irá destinada ao innovador plató. 

Actualmente, o sector audiovisual galego representa o 28% do total da industria cultural, xera máis de 4.500 empregos, factura 411 millóns de euros e agrupa a 707 empresas na comunidade.

Ficción e Setemedia asisten a Content London 2022 a través da delegación empresarial promovida polo Clúster

As compañías Ficción Producciones e Producciones Audiovisuales Setemedia participaron esta semana en Content London 2022, o mercado de coprodución de series e contidos para televisión celebrado na cidade londinense. Ambas produtoras integraron a delegación do audiovisual galego neste foro, que foi promovida polo Clúster Audiovisual Galego. 

Desta maneira, o Clúster, co apoio do Igape, facilitou a presencia de profesionais no mercado de coprodución e conferencias sobre series de TV, Content London, que supón un encontro imprescindible para a coprodución europea de televisión. 

Os empresarios máis importantes do sector en todo o mundo reuníronse arredor de conferencias e screenings, xerando un networking imprescindible para os produtores galegos que queiran internacionalizar a súa empresa pola vía da coprodución internacional para TV.


Co apoio de:


O Clúster Audiovisual Galego lidera o proxecto colaborativo MEDRETIA

O Clúster Audiovisual Galego lidera o proxecto colaborativo baseado en técnicas de intelixencia artificial MEDRETIA para o desenvolvemento de predicións a partir de datos multisectoriais, e determinar un sistema intelixente para a predición de éxito (audiovisual) e vendas (téxtil) dos produtos monitorizados permitíndolles ás empresas adiantarse ás necesidades do mercado en base aos datos históricos de temporadas anteriores. 

O Clúster desenvolve o proxecto MEDRETIA en colaboración coas empresas Corporación Radio Televisión de Galicia (CRTVG), Duacode e Selmark, o centro tecnolóxico Instituto Tecnolóxico de Galicia (ITG) e a Asociación para a Dixitalización da Industria de Galicia, Galicia Dixital. 

O proxecto MEDRETIA ten o seu antecedente nos resultados do estudio de viabilidade liderado polo Clúster AUDIENCELAB BIG DATA, financiado pola convocatoria 2018-19 de axudas de apoio a agrupacións empresariais innovadoras, para a construción dun piloto que permitira medir o consumo audiovisual dos mozos nas novas plataformas. O resultado do estudio de viabilidade desembocou en información de gran utilidade para as empresas do consorcio que desenvolveu o proxecto, permitindo incrementar o valor de cada produción audiovisual xerada polas produtoras e empresas de creación de contidos audiovisuais con datos ata ese momento de difícil acceso.  

O proxecto MEDRETIA conta coa financiación do Ministerio de Industria, Comercio e Turismo, a través do programa de apoio a Agrupacións Empresariais Innovadoras (AEI) para contribuír á mellora da competitividade da industria española, resultando beneficiario, na súa segunda convocatoria do año 2022, dunha axuda de 141.084 euros.




Co apoio de:

Estréase na Coruña o documental “María Casares: a muller que viviu mil vidas”, de Agallas Films

O documental producido pola nosa asociada Agallas Films “María Casares: a muller que viviu mil vidas” estreouse o luns 21 no Teatro Colón da Coruña, tralo seu paso polo Festival Internacional de Cine de Ourense e pola Seminci de Valladolid, e coincidindo co día no que se celebran os 100 anos do nacemento da actriz.

Na mañá do mesmo luns, o filme dirixido por Xavier Villaverde presentouse nun acto que contou coa participación do delegado da Xunta, Gonzalo Trenor. O documental recibiu subvención da Consellería de Cultura, Educación, FP e Universidades.

Trenor destacou que “este documental proponnos un achegamento íntimo e profundizo á vida desta muller extraordinaria, e un homenaxe, desde a súa Galicia natal, a unha figura deslumbrante, magnética e fundamental nas artes escénicas da Europa do século XX”. Conta coas intervencións —entre outros— de María Lopo, Emilio Grandío, Manuel Rivas, Mabel Rivera, Johanna Silberstein, Jorge Lavelli, Marion Chénetier-Alev e Manolo Lourenzo.

O Clúster Audiovisual Galego renova a súa acreditación como Agrupación Empresarial Innovadora, concedida polo Ministerio de Industria

En 2010 o Clúster Audiovisual Galego inscribiuse no Rexistro de Agrupacións Empresariais Innovadoras. Desde ese ano, o Clúster dispón do recoñecemento de AEI con nivel de excelencia outorgado polo Ministerio de Industria, Comercio y Turismo. Esta cualificación veuse renovando periodicamente, téndose consolidado o Clúster Audiovisual Galego na actualidade como o único clúster do sector a nivel nacional que dispón desta acreditación.

O Clúster anuncia os 18 proxectos que participarán no "I+P, Ideas para Producir" 2022

O Clúster Audiovisual Galego dá a coñecer os títulos dos 18 proxectos que conformarán a 16ª edición do pitching “I+P, Ideas para Producir”, que se celebrará os días 1 e 2 de decembro na Coruña. 

Dos dezaoito proxectos deste ano, seis correspóndense cos proxectos que participan na primeira edición da incubadora I+P, INCUBA posta en marcha polo Clúster coa financiación do ICAA (Instituto da Cinematografía e das Artes Audiovisuais do Ministerio de Cultura) dentro do marco do Plan de Recuperación, Transformación e Resiliencia aprobado polo Goberno de España e financiado con Fondos Europeos Next Generation EU. Estes traballos son: “Sonámbulo”, “Nexo”, “Cebra con lunares”, “As defensas”, “Juliette y Camille” e “Una de bravas”.

O resto de proxectos foron elixidos entre os máis de 150 traballos recibidos e analizados polo Comité de Selección que, nesta edición, estivo composto polos produtores Alberto Domínguez, Miguel Riaño e Roberto Alvite. 

Os traballos finalistas atópanse en distintas fases de desenvolvemento e inclúen longametraxes de ficción e documental; series de ficción, documentais e de animación; miniseries de ficción e un programa documental. 

A sesión de pitching e as reunións one to one celebraranse o venres 2 de decembro no Centro Ágora da Coruña e suporán unha excelente oportunidade para a venda, financiación, distribución e coprodución de contidos para cine e televisión. Os traballos serán presentados ante un auditorio formado por responsables de contidos de canles de televisión, plataformas, produtoras e distribuidoras de primeiro nivel como RTVE,  Mediaset España, Atresmedia, Movistar Plus+, Amazon Studios, AMC Networks, CRTVG, TV3, Aragón TV, Filmax, A Contracorriente Films, DeAPlaneta, Warner Bros. Discovery, Motion Pictures Entertainment ou Portocabo, entre outras. 

Os 18 proxectos que participarán na 16ª edición do “I+P, Ideas para Producir” son:

“Sonámbulo”, longametraxe de ficción de Vaca Films.

“As defensas”, longametraxe de ficción de Cósmica Producións.

“Para ver o mar”, longametraxe de ficción de TEX45 Producións.

“Singular”, longametraxe de ficción de White Leaf Producciones.

“Azul 91”, longametraxe de ficción de Norte Catro Cinema.

“Balazos y palomitas”, longametraxe de ficción de Love Monster.

“Marma Rabbit Boy”, longametraxe de ficción de CSC Films.

“Juliette y Camille”, longametraxe documental de Sétima.

“Nexo”, serie de ficción de Voz Audiovisual.

“Una de bravas”, serie de ficción de Kaboga Films.

“Bou Eva”, longametraxe de ficción de Visioners Entertainment.

“Cebra con lunares (Polka dot Zebra)”, serie de animación de Xosé Zapata.

“Rebaño”, serie documental de Producións A Fonsagrada (Filmax).

“Paixón”, serie documental de Avendaño Estudio.

“El Perdón”, miniserie de ficción de Corte y Confección de Películas.

“Normal”, miniserie de ficción de Lidia Fraga.

“El rastro del Arropiero”, miniserie de ficción de Héctor Escandell.

“As orixes dos mitos galegos”, programa documental de Producciones Vigo – EISV.

Os proxectos de longametraxes e series en desenvolvemento seleccionados gozarán de maneira gratuíta dunha subscrición por tempo ilimitado no mercado online de Filmarket Hub, que ofrece a plataforma como empresa colaboradora do evento, onde poderán potenciar a súa visibilidade e conectar con toda unha rede de produtores e empresas de Europa e Latinoamérica. Obtendo unha maior visibilidade e novas oportunidades de atopar socios interesados nos seus proxectos e podendo acceder a outras empresas, ademais das que participen no Pitching.

Neste 2022 o “I+P, Ideas para Producir” conta co apoio da Xunta de Galicia, a través da Axencia Galega das Industrias Culturais (AGADIC) e do Instituto Galego de Promoción Económica (Igape). Coa colaboración do Concello da Coruña, das asociacións CREA e AGAG, da plataforma Filmarket Hub e do Máster en Produción Xornalística e Audiovisual (MPXA), e co patrocinio de Galicia Calidade, Gadisa e das compañías Music Library & SFX e Cinetools.

 

Ración de zombis á galega no tráiler da primeira longametraxe de Melgo Cinema, “As tres vidas de María Santiso”

“As tres vidas de María Santiso” é a primeira longametraxe levada a cabo pola nosa asociada Melgo Cinema, produtora que desenvolve proxectos en diversos formatos e xéneros na Coruña dende 2018. Supón a continuación da historia de “As tres caídas de María Santiso”, unha curtametraxe de comedia dramática protagonizada por Lucía Veiga que foi o seu primeiro traballo, na que abordaba a vida no rural e a soidade.

Esta curta vén de ser proxectada en Pozuel de Ariza (Zaragoza) como parte do V Ciclo nacional de cine e mulleres rurais.

“’As tres vidas de María Santiso’ é unha reviravolta ao tipo de proxectos que creamos en Melgo Cinema. Rodamos parte da longametraxe este verán e rematarémola en primavera, de cara a un lanzamento en outono de 2023”, avanza Roberto Alvite, actor, produtor, guionista e director coruñés.

A familia, a desmemoria e a incomunicación son os temas centrais neste traballo audiovisual, o cal foi rodado parcialmente este pasado mes de agosto en localizacións dos municipios de Oleiros e Cambre.

No tráiler estreado publicamente con motivo das celebracións arredor do Día dos Defuntos pódese intuír “o ton de serie B co que queremos abordar formalmente os vaivéns de María Santiso, unha muller que non está disposta a ser esquecida facilmente. Porén, no fondo, é unha historia dura que fala das nosas miserias como persoas e como sociedade. Os zombis son un espello no que é divertido mirarnos”, segundo explica Alvite.

 

A Televisión de Galicia producirá 27 proxectos nativos dixitais

A CRTVG vai producir 27 proxectos no marco da convocatoria de selección de productos dixitais en lingua galega, resolta o pasado mércores 26 de outubro pola Comisión Directiva de Avaliación de Proxectos da Corporación.

Entre os seleccionados hai contidos de ficción, humor, divulgación, educación, cultura ou infotainment. Doce deles responden ao formato longo e para cuxa produción contarán con 20.000 euros cada un. Outros 19 foron seleccionados como microespazos e están dotados con 3.000 euros por proxecto. Todos eles teñen en común que están creados especificamente desde e para a contorna dixital, xa que os 27 proxectos serán emitidos a través das canles dixitais, páxina web e redes sociais dos medios públicos galegos.

Esta convocatoria, á que se presentaron 106 traballos, enmárcase na estratexia de dixitalización, innovación e posicionamento dos medios públicos na contorna dixital e a súa relación co sector audiovisual. Este proxecto ten o obxectivo de promover a creatividade neste eido e procurar xeitos de produción de contidos multiplataforma e transmedia en lingua galega, que permitan novas formas de interacción coa audiencia, e dean cabida nos medios públicos a expresións artísticas netamente dixitais.

Na categoría de pezas de vídeo cunha duración máxima total de 50 minutos, aprobáronse os seguintes 12 proxectos:

O mellor tractor do mundo’, de A Revolta Producións, S.L., é un programa-concurso que busca o mellor tractor de Galicia. En cada capítulo preséntanse unha serie de participantes que amosarán as súas destrezas co seu tractor. Os usuarios serán os encargados de escoller semanalmente o seu tractor (e condutor) gañador.

Os Metarquivos’, de Xaime Miranda Méndez, é un programa de ciencia ficción para todos os públicos. A través de ilustracións, relátanse historias autoconclusivas que se ambientan en mundos fantásticos e futuros distópicos. Utilízase a intelixencia artificial na ilustración dos procesos de animación.

Os Xabaxogos’, de Iago Gordillo Trigo, é unha serie de vídeos dun minuto que descobren os videoxogos que xurdiron a partir das distintas series emitidas no Xabarín Club. Logo de introducir os datos clave sobre a serie orixinal, fala dos xogos máis importantes que se inspiraron nela nun formato de consumo fácil a través das redes sociais.

Rent-A-Pal’, de Iria Iglesias Martínez, é unha webserie dramática de tres episodios. Ao redor da idea de que todo se pode mercar, nesta ficción existe unha aplicación na que se alugan amigos. ‘Rent-A-Pal’ explora a soidade como un dos problemas fundamentais da sociedade actual.

A previa’, de Cristela Torres Nine, consistente nun talk-show transmedia vinculado á webserie 'Pringadas', premiada no festival Carballo Interplay. ‘A previa’ é o primeiro programa dixital sobre a vida universitaria galega no que as condutoras reflexionan sobre unha temática principal canda un convidado especial pertencente a unha facultade ou a un centro de formación distinto.

Furallolo@s’, de Kaito Estudios, S.L., é un proxecto de entretemento con clave humorística. Neste programa xúntanse famosos da contorna para que midan as súas habilidades aos mandos deste xogo ancestral: o futbolín. Ao tempo que se desenvolve o duelo, haberá conversas a través das que coñecelos máis fondamente. Os convidados loitarán por un premio en forma de doazón benéfica.

Incalculable’, de Xiana Fernández-Albor, proxecto no que a través de vídeos divulgativos nos que se combinan imaxes de alta definición con realidade aumentada, coñecerase en cada un unha especie animal galega: como vive, como sobrevive e como se relaciona. Apréndese cales son os beneficios que dá dita especie e intenta poñerlle prezo a ese traballo que a especie fai para nós, de aí o nome do programa.

Comedia de pé’, de Drapper & Sterling, S.L., é un proxecto de humor baseado no xénero stand-up comedy americano. Os programas expoñen os monólogos de humoristas de primeiro nivel do panorama galego actual.

Danza no foco’, de Margherita Morello (16 Thunders), é unha serie de cápsulas visuais onde intérpretes da danza contemporánea galega dialogan co espazo a partir dos textos dun tema musical en lingua galega, cuxas palabras animadas completan a coreografía.

San Simón, a colonia penal’ (5x6’), de Miramemira, S.L., é unha docuweb que achega a etapa histórica da illa de San Simón no momento que foi unha colonia penal. Localízase no tempo entre o inicio da Guerra Civil ata o ano 1943. O proxecto combina a narración audiovisual coa utilización de ferramentas de navegación en liña.

Nosoutras’, de Undodez, S.L., consiste nun proxecto cultural que, a través de vídeos divulgativos, intenta poñerlles nome a todas aquelas mulleres que destacaron historicamente no mundo da cultura en Galicia ou que foron abrindo camiño para as novas xeracións de creadoras.

Bechos’, de Undodez, S.L., é un proxecto infantil divulgativo con contido animado sobre o medio ambiente. Pretende sensibilizar os máis novos sobre as cuestións medioambientais inmediatas e actuais visibles en Galicia e máis aló. O obxectivo é concienciar sobre o futuro.

Na categoría de proxectos compostos por pezas de vídeo cunha duración máxima total de 10 minutos, aprobáronse os seguintes 15:

Se ti souberas’, de Xarda Sociedade Cooperativa Galega, que fala dos influencers galegos do pasado. Constrúe unha ponte interxeracional coa idea de que a mocidade coñeza as historias de galegos influentes, falando das súas historias e de curiosidades da vida social galega. Unha acción para superar o idadismo da sociedade actual.

Árbores en Galicia’, de Zero Entertaintment Galicia S.L., é un programa divulgativo que pretende axudar a identificar as árbores galegas e outras que conviven connosco aínda non sendo autóctonas. Os seus froitos, a súa madeira, as súas follas, como é o seu tronco, etc, así como a cultura popular arredor delas.

Terapia de parella’, de Kraken Media S.L., é unha ficción contada a través de redes sociais pertencente ao xénero da comedia. Nela amósanse tres parellas de idades diferentes, procedencias e xéneros, que acoden á consulta dunha terapeuta para tratar de salvar as súas relacións. Serán os usuarios quen decidan o destino desas parellas ao final de cada capítulo.

Sabías que’, de Coven Films, S.L., é un proxecto divulgativo a través do cal se pretende achegar curiosidades (tradicións, eventos singulares ou acontecementos históricos) de diferentes lugares da xeografía galega.

Paradas no camiño’, de Cristina Martínez Rodríguez, é un programa dixital que pretende amosar a gran riqueza do Camiño de Santiago. Dá consellos, información útil sobre os lugares e recomendacións das mellores opcións gastronómicas.

Tres cousas tres’, de Víctor Grande Estévez, é un proxecto divulgativo que informa a través de vídeos de menos dun minuto sobre tres cousas curiosas dunha temática concreta de interese galego.

A ghavota’, de Margherita Morello (16 Thunders), é unha webserie que conta a historia da primeira e última fareira rockeira do cabo Touriñán. Pretende ser un conto visual que une a tradición mariñeira coa música.

Historias moi pequenas’, de Javier Santos Díaz, é un proxecto divulgativo que a través de vídeos conta curiosidades e a historia dos pequenos obxectos que nos rodean no día a día. Inclúe elementos complementarios nunha estratexia dixital.

Historia da historia’, de Miraveo Assets, S.L., é un proxecto divulgativo que pretende ensinar algo novo de forma rápida e sinxela ao contar datos descoñecidos sobre o pasado de Galicia en vídeos de dous minutos.

Coñece o mar, con Rogelio Santos’, de M International Audiovisual Comunication, S.L., é un proxecto divulgativo centrado na figura ('influencer' do mar) de Rogelio Santos. Este mariñeiro de Porto do Son axuda a coñecer mellor o mar e todo o que ofrecen as augas galegas.

Nada por alá’, de M International Audiovisual Comunication, S.L., é un proxecto de entretemento no que o mago David Maestro executa números de maxia a través de vídeos curtos.

As cousas do choio’, da Asociación Merenda Creativa, consiste nunha canle dun ‘falso youtubeiro’ chamado Juan ‘o Choio’, de oitenta anos. Nos seus vídeos conta útiles ensinanzas empregando o sentido do humor e a sabedoría popular.

Vida salvaxe’, de Tamboura Films, S.L.U., é un proxecto divulgativo sobre a fauna salvaxe galega. Nel dáse a coñecer persoas que investigan estas especies e que contan como as estudan e cal é a importancia da súa conservación.

Agora cantamos nós’, da Asociación Cultural e Pedagóxica Ponte Nas Ondas, é un proxecto de micropezas divulgativas coas que se pretende dar a coñecer o traballo desenvolvido por 17 centros educativos de Galicia e Portugal e 16 artistas colaboradores dentro do proxecto Meniños Cantores.

Xeración 0’, de Neo ZK Media, S.L.U., é un proxecto divulgativo sobre medio ambiente. Nel xúntase unha conglomeración de ideas e consellos que axudan a reducir os residuos contaminantes para este planeta.

Preséntase “O noso pasar: A nosa natureza”, proxecto de Roberto Alvite apoiado polo programa “O teu Xacobeo”

A docuficción “O noso pasar: A nosa natureza” presentose este xoves na Filmoteca de Galicia coa presencia do seu director e socio do Clúster Roberto Alvite, e tres dos voluntarios e voluntarias, procedentes de Colombia (Nico Lozano) e de Venezuela (Cindy Mejías y Dulce Díaz), que explican no proxecto dunha maneira fresca e honesta, xunto a un voluntario de Ucraína (Yevhen Rubaniak), a súa chegada a Galicia, así como a súa relación co medio ambiente e co Camiño de Santiago. Á presentación tamén acudiu o delegado territorial da Xunta na Coruña, Gonzalo Trenor.

Roberto Alvite, actor, produtor, guionista e director coruñés, explicou: "Sacar adiante "O noso pasar: A nosa natureza" foi todo un reto creativo ao combinar documental e ficción e dous xéneros como fantasía e traxicomedia, pero na medida en que logramos conectar puntos de vista multiculturais e sans sobre a relación co nosos medio ambiente grazas ao equipo e aos voluntarios, estou orgulloso do resultado. Traballaremos por que o proxecto viaxe o máis lonxe posible".

Este traballo forma parte do programa “O Teu Xacobeo” da Xunta de Galicia, que pretende fomentar a participación de todos os galegos para seguir construíndo unha cultura común sobre o Camiño. Trátase da maior convocatoria aberta da historia desta comunidade autónoma. Gonzalo Trenor, delegado territorial da Xunta na Coruña, afirmou durante a presentación: “é un pracer para min estar hoxe nesta presentación no nome da Xunta de Galicia, para nós é moi importante apoiar proxectos audiovisuais que axuden a coñecer o Camiño e que transmiten valores como o coidado da natureza e o noso patrimonio. O programa ‘O teu Xacobeo’ está sendo un éxito porque visibiliza o enorme talento que temos en Galicia en todos os ámbitos”.

Para Roberto Alvite “’O noso pasar’ é un universo de proxectos transmedia que iremos producindo en Melgo Cinema ao longo dos próximos anos, ata rematar no Xacobeo 2027: unha docuficción, un proxecto de realidade virtual, un videoxogo e unha miniserie de ficción. Neles dou vida ao personaxe central, Santi, unha interpretación libre e retranqueira do Apóstolo Santiago”.

 

O medio ambiente, a inmigración e o “Camiño Inglés” son os temas centrais neste traballo audiovisual, no que tamén participaron CREA SGR e Triodos Bank, e que se rodou a finais de setembro en localizacións dos municipios coruñeses Miño, Paderne e Betanzos, tres localidades que forman parte deste “Camiño”.

“O noso pasar: A nosa natureza” tamén quere poñer en valor a Reserva da Biosfera Mariñas Coruñesas e As Terras do Mandeo, consideradas espazos protexidos. Aborda o maltrato dos recursos naturais comúns en Galicia e busca xerar conciencia a favor da conservación do patrimonio e do medio ambiente galegos. Obxectivos que entran dentro da liña social que promove a produtora Melgo Cinema en todas as súas propostas.