Cluster Audiovisual Galego

Noticias del Clúster

Seleccionados os seis proxectos da 1ª edición de I+P, INCUBA

I+P, INCUBA, a incubadora de proxectos de cine e televisión do Clúster Audiovisual Galego, seleccionou os seis proxectos que participarán na súa primeira edición. Trátase dun programa de incubación e plataforma de pitching que ten como obxectivo a incubación e mellora significativa de proxectos audiovisuais na fase de desenvolvemento a través de titorías, webinarios e consultaría.  

Os seis proxectos finalistas foron elixidos, entre os máis dos cen recibidos, por un Comité de Selección integrado por Lidia Fraga, guionista e realizadora; Alicia López, coordinadora de contidos en The Mediapro e profesora e mentora de desenvolvemento no Máster de Guión da Universidade Complutense de Madrid e The Mediapro Studio, e Finocha Formoso, profesora na facultade de Ciencias da Comunicación Audiovisual da Universidade da Coruña. 

Entre os proxectos participantes nesta primeira edición están dúas longametraxes de ficción, unha longametraxe documental, dúas series de ficción e unha serie de animación. Cada proxecto recibirá unha dotación de 15.000 euros para completar a fase de desenvolvemento. 

Proxectos seleccionados para I+P, INCUBA 2022: 

Longametraxes de ficción:

Sonámbulo, de Vaca Films Studio.

As defensas, de Nati Juncal (Cósmica Producións).

Longametraxe documental:

Juliette y Camille, de Anxos Fazáns e Silvia Fuentes. 

Series de ficción:

NEXO, de Voz Audiovisual.

Una de bravas, de Anna M. Bofarull. 

Serie de animación:

Cebra con Lunares (Polka dot Zebra), de Xosé Zapata. 

Os participantes no programa de incubación asistirán a sesións presenciais na Coruña e sesións online, que se celebrarán entre os próximos meses de setembro e novembro. Ao finalizar a incubación os seis proxectos presentaranse en decembro no pitching “I+P, Idea para Producir”. 

I+P, INCUBA é unha iniciativa do Clúster Audiovisual Galego, que conta co financiamento do Instituto de la Cinematografía y de las Artes Audiovisuales (ICAA) do Ministerio de Cultura y Deporte, ao abeiro do Plan de Recuperación, Transformación e Resiliencia, e dos fondos Next Generation da Unión Europea.


O Clúster conclúe o seu proxecto de transcrición e subtitulado automático ao galego: TILGAL

O Clúster Audiovisual Galego vén de desenvolver o proxecto TILGAL: Ferramenta de Transcrición e Subtitulado Automático ao Galego, xunto ás empresas socias Adivina Producciones, CRTVG, Setemedia Producciones Audiovisuales e Voz audiovisual, así como ao Grupo de Tecnoloxías Multimedia (GTM) do centro de investigación AtlanTTic da Universidade de Vigo e á empresa imaxin|software. Esta iniciativa permitiu validar o estado actual da tecnoloxía de recoñecemento automático da fala para a elaboración de subtítulos de produtos audiovisuais en galego.

O proxecto TILGAL consistiu na realización dun estudo de viabilidade para definir as necesidades da industria audiovisual galega para afrontar o proceso de subtitulado nesta lingua e para o futuro desenvolvemento dunha ferramenta automatizada de transcrición e subtitulado ao galego, que permita incrementar a  competitividade  mediante  a redución   do   tempo   dedicado  á   transcrición  e   subtitulado, e a  implementación  de tecnoloxía innovadora que lles aporte ás  empresas  unha  serie  de  vantaxes  competitivas ata agora  inexistentes no sector.

TILGAL enmárcase na liña estratéxica de innovación e transformación dixital dentro do Plan Estratéxico do Clúster para o período 2022-2025, a través da que se busca un dobre obxectivo, por unha banda, impulsar os proxectos colaborativos de innovación dentro do sector audiovisual galego e pola outra a mellora tecnolóxica 4.0. Neste sentido, o proxecto está aliñado, a  nivel  autonómico,  coa Axenda  de  Competitividade IndustriaGalicia 4.0 e, a nivel nacional, coa Axenda España Dixital  2025.

Este proxecto foi financiado polo programa de apoio ás Agrupacións Empresariais Innovadoras (AEI) do Ministerio de Industria, Comercio y Turismo na súa segunda convocatoria de 2021. E conta coa colaboración da Secretaría Xeral de Política Lingüística da Xunta de Galicia.

 

Colaboración entre o Clúster Audiovisual Galego e Fuell

O Clúster Audiovisual Galego e a compañía Fuell alcanzaron un acordo de colaboración, polo que calquera asociado ao Clúster que contrate os seus servizos gozará de descontos nas tarifas e dunhas condicións vantaxosas.

Que é Fuell?

Fuell é unha empresa líder na xestión de gastos corporativos especializada no sector audiovisual. Traballa con algunhas das produtoras de máis prestixio en España, como Filmax, Nostromo, Morena Films, Plano a Plano, etc.

Fuell facilita a xestión e xustificación de gastos corporativos durante producións, proporcionando tarxetas físicas e virtuais aos empregados e un software de xestión de gastos. É unha plataforma flexible que se adapta á alta rotación de persoal vinculado a producións e rodaxes.

A curtametraxe “The Monkey” inaugura o Bogotá Audiovisual Market (BAM)

A curtametraxe “The Monkey”, dirixida polo noso socio Xosé Zapata e por Lorenzo Degl´Innocenti, foi a convidada a inaugurar o BAM (Bogotá Audiovisual Market) coa súa proxección na cerimonia de apertura do mercado celebrada na Cinemateca de Bogotá.

Organizado pola Cámara de Comercio de Bogotá e o Ministerio de Cultura de Colombia (Proimágenes), o BAM é unha cita moi importante no calendario de eventos cinematográficos de Sudámerica, con máis de 1.000 acreditados e coa presenza destacada de países como Colombia, México, Estados Unidos, Perú, Chile ou España.

“The Monkey”, recentemente gañador do Premio a Mellor Curtametraxe no festival Mundos Digitales (A Coruña), foi proxectado ante os 300 convidados á inauguración, xunto á curtametraxe colombiana “Reparaciones” do cineasta Wilson Borja, que obtivo o galardón a mellor curta na sección “Perspectives” no recente Festival de Animación de Annecy, o máis importante do mundo.

Segundo o director do evento, Carlos Moreno: “Estas dúas curtametraxes demostran a variedade e puxanza do cine de animación latinoamericano que con poucos medios e moita imaxinación é capaz de desenvolver proxectos de éxito internacional”.

No acto de inauguración estiveron presentes os directores Xosé Zapata e Wilson Borja para debatir sobre as súas curtametraxes e tratar aspectos visuais de ambas producións. Xosé Zapata tamén participou en debates e charlas durante os tres días nos que se celebrou o BAM na cidade de Bogotá onde presentou por primeira vez en Sudamerica “The Monkey”.

Esta curtametraxe, que foi estreada en Norteamérica nos festivais de Vancouver e Sant Louis, foi seleccionada nun dos festivais máis prestixiosos do mundo en Stuttgart, “The Monkey” é xa o representante de España e está cualificado para a presente edición dos Premios Oscar ao ser a curtametraxe gañadora do Goya 2022.

 

Portocabo grava en Galicia para RTVE a serie infantil “Los argonautas”

A nosa asociada Portocabo e RTVE xa están gravando en Galicia a serie infantil “Los argonautas”, primeira produción de ficción en imaxe real de Clan.

A canle infantil estará todo o verán, ata setembro, rodando esta serie “integradora”, dirixida a nenos de 8 a 12 anos, que aposta pola diversidade. Laxe e A Coruña son as principais localizacións de rodaxe.

Inspirada en grandes clásicos, como ‘El club de los cinco’ ou ‘Los Goonies’, adaptados ao século XXI, ‘Los argonautas’ reúne a unha panda de cinco amigos que vivirá un verán diferente. Xuntos veranse envoltos nunha grande aventura enfrontando perigos e descubrindo o valor da amizade.

Nenos e nenas de realidades diferentes unidos para formar unha panda diversa, ben polo seu estrato social, pola súa cultura, pola superación de barreiras ou polo seu xénero. A cooperación será sempre a clave do éxito. A serie aposta pola diversidade, abrindo ventás a comunidades de inmigrantes, pequenas e non tan pequenas, como a caboverdiana, que enriquecen a nosa sociedade. Outra faceta que recolle é a superación de barreiras. Coñeceremos a Olivia, unha nena xorda que non ten problemas en comunicarse cos demais, e á súa familia, distinta e perfectamente integrada.

A trama xira arredor dun grupo de cinco amigos que vivirá un verán diferente ao verse envoltos nunha grande aventura. Enfrontándose a distintos perigos, descubrirán o valor da amizade, a superación de barreiras, o encaixe das diferenzas, a integración ou a cooperación como clave para o éxito común. A ficción aposta así pola diversidade ao abrir xanelas a comunidades de inmigrantes como é o caso da caboverdiana ou a realidades como a de Olivia, unha nena xorda que non ten problemas en se comunicar cos demais.

Presentación do inicio de rodaxe

Ao encontro de inicio de rodaxe acudiron Yago Fandiño, director de Contidos Infantís de RTVE e Clan; e Alfonso Blanco, CEO de Portocabo e produtor executivo da serie; Jacobo Sutil, director de AGADIC (Axencia Galega das Industrias Culturais); José Luis Pérez Añón, alcalde de Laxe, e Fernando R. Ojea, director de Contidos de TVG. Estiveron acompañados polos directores da serie, Toño López e Lucía Estévez, e parte do elenco, do que forman parte intérpretes como Eva Fernández, Federico Pérez e os mozos Aliyah Fidalgo, Sarela Montes, Brais Sixto, Claudia Pujaldes, Juan Rodríguez, Lúa Varela ou Xoel Río.

A TVG destina 330.000 euros na súa convocatoria de proxectos de contidos dixitais

A CRTVG abre unha nova vía de produción e colaboración co sector audiovisual cunha convocatoria de selección de proxectos dixitais en lingua galega, a de maior contía económica ata a data.

Elixiranse ata 42 proxectos destinados á emisión a través das canles dixitais, páxina web e redes sociais, dos medios públicos galegos. As propostas deberán ser contidos de ficción, humor, divulgación, educación, cultura ou infotainment en formato longo ou en forma de microespazos/serie, e deben ser feitas especificamente para a contorna dixital.

Esta convocatoria, que estará aberta ata o 15 de agosto, enmárcase na estratexia de dixitalización, innovación e posicionamento dos medios públicos na contorna dixital e a súa relación co sector audiovisual. Este proxecto ten o obxectivo de promover a creatividade neste eido e procurar novas formas de produción de contidos multiplataforma e/ou transmedia, en lingua galega, que permitan novas formas de interacción coa audiencia e dean cabida nos medios públicos a novas formas de expresión artística netamente dixitais.

Dos 42 proxectos que se seleccionarán, doce deberán ser pezas de vídeo cunha duración entre 5 e 50 minutos, e cun orzamento por proxecto non superior aos 20.000 € máis IVE. Os outros trinta proxectos deberán estar compostos por un conxunto de pezas de vídeo cunha duración mínima por peza de medio minuto e máxima de 10 minutos. O orzamento de cada proxecto non poderá superar os 3.000 €, máis IVE.

“É sabido que unha parte importante do público consume audiovisual tamén a través de dispositivos dixitais, sobre todo o móbil, polo que tentamos fomentar a creatividade dirixida a este segmento da audiencia. Son contidos que para ter visibilidade e interacción adoitan ter unha linguaxe diferenciada da televisión e por isto facemos esta convocatoria", destaca Fernando R. Ojea, director de Contidos da CRTVG.

A convocatoria foi deseñada tamén deste xeito para facilitar o acceso de pequenas empresas ou profesionais individuais que poden ter máis dificultades para presentar proxectos destinados á emisión por medios tradicionais e cun orzamento máis elevado.

Con medidas coma esta, a CRTVG segue a abrir vías de colaboración co sector audiovisual galego como empresa integradora da cadea de valor da industria cultural e creativa galega.

Toda a información sobre a convocatoria pode consultarse aquí.

O Clúster e Fuell celebran o 15 de xullo o webinar "A xestión de gastos no sector audiovisual"

O Clúster Audiovisual Galego, en colaboración con Fuell, celebrará o venres 15 de xullo, de 12:30 a 13:30 horas, o webinar "A xestión de gastos no sector audiovisual". Fuell é a empresa líder na xestión de gastos corporativos especializada no sector audiovisual, que traballa con algunhas das produtoras de máis prestixio en España, como Filmax, Nostromo, Morena Films ou Plano a Plano.

Fuell facilita a xestión e xustificación de gastos corporativos durante producións, proporcionando tarxetas físicas e virtuais aos empregados e un software de xestión de gastos. É unha plataforma flexible que se adapta á alta rotación de persoal vinculado a producións e rodaxes. 

Por un tempo limitado, Fuell ofrécelle aos membros do Clúster Audiovisual Galego unha oferta especial, que será presentada durante o webinar. 

AXENDA WEBINAR  

·         Apertura por parte do Clúster Audiovisual Galego

·         Presentación sobre Fuell e a plataforma

·         ELES FALAN DE NÓS | Caso de éxito

·         Presentación tarifas especiais para socios do Clúster

·         Preguntas

Esta actividade está aberta a todo o sector, previa confirmación de asistencia no mail comunicacion@clag.es. Enviarese ligazón de acceso á sesión. 

A audiencia da TVG medra en xuño e acada o 10,1 %

As audiencias da TVG no mes de xuño superaron os dous díxitos, cun 10,1 % no conxunto do día e un 10,3 % de cota no prime time, a franxa máis vista da xornada. Con estes datos, a media da canle pública galega no que levamos de 2022 é o 10,3 %, dato superior ao do 2021 (en 2 décimas).

Ademais, neste xuño, a TVG crece entre o público máis novo, xa que incrementou a súa audiencia en 3 décimas entre a poboación de 4-12 anos, en 5 décimas no target de 13 a 24 anos, e en 1,5 puntos na franxa de idade de 25 a 44 anos.

A audiencia da TVG, pese á competencia, segue a ser sólida en todas as franxas horarias, tanto de informativos como entretemento, o que significa que conecta coa sociedade galega de forma transversal con toda a súa oferta. Así, de luns a venres, a TVG acaba o día por riba dos dous díxitos: luns (10,4 %), martes (10,2 %), mércores (10,4 %), xoves (10,6 %) e venres (11,2 %).

Incremento de audiencia nos informativos e prime time

Na mañá, serán e noite, os informativos da Galega medraron en xuño. Os principais informativos no último mes: ‘Bos Días de luns a venres’ (+1,8 puntos), ‘Bos Días fin de semana’ (+2 puntos), ‘A Revista’ (+0,8 puntos), ‘Galicia Noticias luns a venres’ (+1,8), ‘Galicia Noticias fin de semana’ (+0,7), ‘Telexornal Mediodía’ (+2), ‘Telexornal Mediodía fin de semana’ (+1,1), ‘Telexornal Serán’ (+0,7) e ‘Telexornal Serán fin de semana’ (+0,6).

O prime time, a franxa de máis consumo e na que a TVG compite con produtos creados no sector audiovisual galego, tamén medrou con respecto ao pasado mes ata situarse no 10,3 %, o que supón tamén sete décimas máis que en xuño de 2021. Nesta faixa cómpre destacar as cotas acadas os mércores (10,6 %), os xoves (11 %), os venres (10,7 %) e os sábados (11,2 %), día no que lidera as audiencias Galicia.

Por outra parte, a TVG segue a ser un dos motores da rede de FORTA, que reúne as canles autonómicas, ao superar a este grupo en 1,5 puntos de cota no conxunto do día.

Estrea de “Saudade de ti”, a nova serie diaria da Televisión de Galicia, producida por Voz Audiovisual

O domingo 3 de xullo estréase na Televisión de Galicia “Saudade de ti”, a nova serie diaria da Galega producida por Voz Audiovisual, que se emitirá de domingo a xoves. Un tráxico accidente no que morren dúas persoas sacode a vida de tres familias e obriga a Celia, filla dunha das falecidas e doutora de profesión, a facerse cargo do seu pai, da consulta da vila e de todos os pacientes do contorno, á vez que tratan de pechar as feridas polo ocorrido. Así comeza “Saudade de ti”.

Romance, intrigas familiares e moitos segredos que sairán á luz tras o fatídico accidente ocorrido na vila mariñeira de Abrente nas festas do Carmen. Axiña as malas linguas comezan a espallar rumores, porque a doutora que ía nun dos vehículos viaxaba acompañada dun home que non era o seu marido, e a moza que conducía o outro non tiña carné, polo que, a partir dese momento, as súas familias terán que curar tamén as súas feridas e adaptarse, se poden, á nova realidade.

“Saudade de ti” está ambientada na vila costeira e ficticia de Abrente. Para erguer todo o seu universo, o equipo de Voz Audiovisual levantou unha ducia de decorados que dan cabida desde o centro médico da vila, no que traballa Celia, ata a empresa da familia López Castro, pasando polo bar que rexenta a familia Eiroa.

Ademais o equipo desprazouse varias xornadas para rodar en puntos tan singulares como Caión, en A Laracha; Ares, que acolleu a gravación no porto e na praia do Raso; ou Miño, no que a planta baixa da súa casa consistorial converteuse nun hospital.

A serie conta co argumento escrito por Sergio Campo e Jacobo Paz e a dirección de Ozo Perozo, Giselle Llanio e Manu Espiñeira.

En canto ao elenco de “Saudade de ti”, a actriz María Tasende e os actores Adrián Castiñerias e Fran Nogueira conforman o triángulo amoroso da serie. Un reparto de excepción que conta con César Cambeiro, Mayka Braña, Manuel San Martín, María Costas, Alfonso Agra, Carmen Méndez, Fernando Morán, Cristina Andrade, Dani Medín, Carmen Méndez, Alberto Rolán, Paku Granxa ou Beatriz Serén, entre outros.

Filmax consigue 2 Premios Proyecta 2022 con "Donde caben dos" e "Tres"

“Donde caben dos”, producida por Filmax, e “Tres”, producida por Frida Films e distribuída por Filmax, foron dúas das películas galardoadas nos Premios Proyecta 2022. A octava edición destes premios, organizados pola ESCAC (Escuela Superior de Cine e Audiovisuais de Cataluña), celebráronse no Recinto Modernista do Hospital de Sant Pau (Barcelona). O obxectivo destes galardóns é recoñecer e premiar aos profesionais da industria cinematográfica que, sen estar diante das cámaras, son a peza fundamental do puzzle.

"Donde caben dos" conseguiu o premio a Mellor cartel de estrea (película ou serie). É unha picante comedia dirixida por Paco Caballero, que conta cun enorme e refrescante reparto coral: Ernesto Alterio, Raúl Arévalo, Luis Callejo, Anna Castillo, Pilar Castro, Álvaro Cervantes, Carlos Cuevas, Verónica Echegui, Miki Esparbé, Ricardo Gómez, María León, Melina Matthews, Ana Milán, María Morales, Jorgue Suquet e Aixa Villagrán adentraranse no mundo dos swingers en busca de novas experiencias.

“Tres” conseguiu o premio a Melr tráiler de estrea (película ou serie). É o novo thriller de Juanjo Giménez protagonizado por unha brillante Marta Nieto que interpreta a C., unha deseñadora de son que goza do seu traballo e pasa moitas horas soa, gravando efectos sala, wild-tracks, editando, misturando. O estudio é o seu último refuxio: un lugar onde postergar as avariadas relacións que mantén coa súa exparella, coa súa anciá nai e cos seus compañeiros de traballo. Aínda que ela non o sabe, C comeza a desincronizarse. Como se fora unha película mal sonorizada, o seu cerebro procesa o son máis tarde que as imaxes. Completan o reparto Miki Esparbé, Francisco Reyes e os actores galegos Luisa Merelas, Cris Iglesias e Fran Lareu.