O espazo da Galega “Cos pés na terra”, finalista nos Premios Pro-Docs á Mellor Serie Documental

O espazo da TVG  “Cos pés na terra” é finalista nos Premios Pro-Docs 2022 á mellor serie documental. Estes galardóns, que concede a Asociación de Produtores de Documentais, recoñecen as mellores obras documentais televisivas do ano pasado, poñendo o acento no talento, a calidade e a riqueza que existe arredor deste xénero televisivo. Nesta novena edición, os Premios Pro-Docs incorporan por primeira vez a categoría de mellor serie documental televisiva para distinguir o formato das producións por capítulos.

Dirixido por Diego Guerrero Sande e producido polas nosas asociadas Filmax e a CRTVG, “Cos pés na terra” compite na categoría de Mellor Serie Documental con “O rei. Joan Carles I, media vida en Marivent”, producida por MOM Works e IB3 e codirixida por Marta Hierro e Núria Abad; “Terres de cinema”, producida por Andana Audiovisual, Lof Media e Á Punt, está dirixida por Fran Ruvira, e “¿Dónde está Marta?”, de Cuarzo Producciones (Banijay) e Netflix, baixo a dirección da galega Paula Cons.

“Cos pés na terra” é unha serie documental que a TVG emite os luns no prime time, e que foi estreada no ano 2011. Cunha periodicidade semanal, en cada entrega amosa tres historias humanas de homes e mulleres que apostan por construír a súa vida no campo e como medio de desenvolver o traballo. Os gañadores dos Premios Pro-Docs 2022 coñeceranse o próximo 18 de maio no transcurso da gala inaugural do 25 Festival Internacional de Cine Documental “DocsBarcelona”.