Finaliza en España a rodaxe de “La cima”, dirixida por Ibon Cormenzana e protagonizada por Javier Rey e Patricia López Arnaiz

Este luns finalizou en España a rodaxe de "La cima", película que dirixe Ibon Cormenzana. Desde o pasado 21 de decembro a película ródase en localizacións de Aragón, Biscaia e nos Pirineos. Proximamente unha parte do equipo trasladarase a Nepal para continuar a rodaxe no Annapurna, unha das grandes cimas do planeta.

A cinta está protagonizada por Javier Rey (“El verano que vivimos”; serie “Fariña”) e Patricia López Arnaiz (“Ane”, pola que recibiu o Premio Forqué á Mellor Interpretación Feminina. Por este traballo tamén está nomeada aos Premios Goya e aos Premios Feroz; serie “La otra mirada”).
 
"La cima" narra a viaxe emocional de Ione e Mateo, unha aventura que lles axudará a reconectarse coa vida e coa natureza para encarar o seu camiño.
 
Cun argumento orixinal do propio Ibon Cormenzana, o guión está escrito por Nerea Castro (“Mentiras pasajeras”, serie en desenvolvemento por el El Deseo e Viacom). Parte do equipo técnico está integrado por Albert Pascual (“Alegría Tristeza”, “Segundo origen”) na dirección de fotografía, David Gallart (“Quien a hierro mata”’, “Alegria Tristeza”) na montaxe, Fernando Velázquez na música (“Trilogía del Baztán”, “Un monstruo viene a verme”), Zaloa Ziluaga na Dirección de Arte (“Ventajas de viajar en tren”) e Fabiola Ordoyo no deseño de son (“Madre”, “Alegría Tristeza”).
 
"La cima" é unha produción de Arcadia Motion Pictures, Aixerrota Films, LAZONA Producciones, Dorothy Films AIE en coprodución con Noodles Production (Francia). Conta coa participación de EITB e Televisió de Catalunya e co apoio do Goberno Vasco. A socia Filmax encargarase da distribución en España, así como das vendas internacionais.

Sinopse

Mateo (Javier Rey) enfróntase por primeira vez á montaña máis perigosa do planeta, o Annapurna, co reto de chegar ata a cima e cumprir así unha antiga promesa. No seu ascenso sufre un accidente que o deixa inconsciente e gravemente ferido. Horas máis tarde é rescatado por Ione (Patricia López Arnaiz), unha alpinista experimentada que está pasando o inverno nun refuxio, soa e afastada do mundo. A pesar de non entender as razóns que levaron a Mateo ata alí, Ione intentará axudalo a alcanzar a súa meta.