Cluster Audiovisual Galego

Seleccionados 18 proxectos para a 14ª edición do pitching “I+P, Ideas para Producir”, que se celebrará online

04-11-2020

O “I+P, Ideas para Producir” dá a coñecer os 18 proxectos que participarán na súa 14ª edición, organizada polo Clúster Audiovisual Galego e que se celebrará finalmente de maneira virtual debido ao escenario no que nos encontramos a causa da COVID-19. 

Dada a complexa e difícil situación que atravesamos a causa da pandemia do coronavirus, das crecentes restricións sanitarias e por sentido da responsabilidade para contribuír a frear a propagación do virus, o Clúster vén de tomar a decisión de que o “I+P, Idea para Producir” 2020 sexa online. Esta 14ª edición do Pitching celebrarase nas mesmas datas nas que estaba prevista a edición presencial: os días 24 e 25 de novembro, adiantándose a sesión de pitch ao martes 24 pola mañá. 

18 propostas de cine e televisión 

Os dezaoito finalistas foron elixidos entre os 165 proxectos recibidos, un 65% máis que na pasada edición e a cifra máis alta da historia do I+P, e analizados polo Comité de Selección que este ano estivo integrado por José Antonio Cascudo, guionista, escritor e profesor; Susana Maceiras, produtora executiva de Adiviña Producións, e Xosé Leis, produtor e actor. Os traballos elixidos encóntranse en distintas fases de desenvolvemento e inclúen longametraxes de ficción, documentais, series de ficción e animación e outros formatos de televisión. 

A sesión de pitching terá lugar o martes 24 de novembro pola mañá e as reunións one to one desenvolveranse entre a tarde do mesmo martes e o mércores día 25. Os traballos serán presentados diante dun auditorio formado por responsables de contidos de destacadas canles de televisión, plataformas, produtoras e distribuidoras como RTVE, Movistar+, Atresmedia, AMC Networks, CRTVG, TV3, Grupo Euskaltel, Aragón TV, Filmax, A Contracorriente Films, DeAPlaneta, Treeline Distribution ou Portocabo, entre outras. 

Os 18 proxectos seleccionados para a 14ª edición do “I+P, Ideas para Producir” son: 

-          “Monstro”, longametraxe de Gaitafilmes.

-          “Lía”, longametraxe de Matriuska Producciones.

-          “Blink”, serie de televisión de Filmax, Producións A Fonsagrada.

-          “En tus manos”, factual entertainment de Área 5.1.

-          “Los lobos no piden perdón”, serie de televisión de Congo Producciones.

-          “Alice’s Diary”, serie de animación de Parrocha Studio.

-          “Berros, Acordes e Cavernas (Gritos, Acordes y Cavernas)”, programa de televisión de EISV – Producciones Vigo.

-          “Yo, Bárbara”, longametraxe de Olga Osorio.

-          “Cortegada 1907 – 1989“, serie de televisión de María Sierra.

-          “A la cara”, longametraxe de Langosta Films.

-          “Rapaces”, serie de televisión de One In K Million (OIKM).

-          “Por una nube”, longametraxe de Belle Films and TV.

-          “Colores”, serie de televisión de Victoria Mauricio.

-          “Wikinger 7-13”, serie de televisión de Fiction Changing the World.

-          “Nunca te olvidaremos”, serie de televisión de Héctor Beltrán.

-          “El viaje de Lucy”, longametraxe documental de Somadrome Films.

-          “Paréntesis”, coaching show de Alexandre Novo e Marina Badenes.

-          “La Bola de Cristal”, serie de televisión de Big Shiva.

 Neste 2020 o “I+P, Ideas para Producir” conta co apoio do Ministerio de Cultura y Deporte, da Xunta de Galicia, a través da Axencia Galega das Industrias Culturais (AGADIC) e o Instituto Galego de Promoción Económica (Igape), e do Concello de Pontevedra. Tamén conta coa colaboración das asociacións CREA e AGAG, da Pontevedra Film Commission, da plataforma Filmarket Hub e do Máster en Produción Xornalística e Audiovisual (MPXA), e co patrocinio de Gadisa, Galicia Calidade e das compañía Music Library & SFX e Cinetools.

 Ao igual que acontecera en pasadas edicións, os proxectos seleccionados gozarán dun ano de inscrición gratuíta no mercado online de Filmarket Hub, que ofrece a plataforma como empresa colaboradora do evento, onde poderán potenciar a súa visibilidade e conectar con toda unha rede de produtores e empresas de Europa e Latinoamérica. Obtendo unha maior visibilidade e novas oportunidades de encontrar socios interesados nos seus proxectos e podendo acceder a outras empresas ademais das que participen no Pitching.