Cluster Audiovisual Galego

A Televisión de Galicia estrea este sábado a serie prexuvenil “Miracle Tunes” na súa app do Xabarín

09-10-2020

A Televisión de Galicia prepara para este sábado 10 de outubro a primeira estrea en dixital da súa historia. A partir das 10 da mañá estarán dispoñibles na aplicación móbil do Xabarín os 26 capítulos da primeira temporada de Miracle Tunes”, a primeira serie de live action prexuvenil da TVG, que tamén se poderá ver na pequena pantalla a partir do 19 de outubro.

Producida pola galega socia do Clúster Portocabo e a italiana ShowLab, Miracle Tunes” é a adaptación para Europa da serie xaponesa do mesmo nome, que se estreou en 2017 e que desde entón se converteu nun auténtico fenómeno en múltiples países asiáticos.

Esta ficción, adaptación dunha serie animada realizada con actores e actrices reais, combina música, baile, estética futurista e apoderamento feminino. Conta a historia dun grupo de música composto por estudantes que combaten o mal mediante a enerxía positiva que transmiten a través da súa música e dos seus bailes.

As protagonistas de Miracle Tunes” son Emily, Jasmine, Julie, Charlotte e Shophia, que forman o grupo Miracle Miracle. Pero non só son ídolos da música, senón que tamén teñen a misión de loitar en segredo para salvar o mundo da música. Coa axuda da Deusa da música e cos seus bailes terán que intentar recuperar as xoias roubadas por Demon e agora en poder dos Doku Doku Dan. Demon converteu as xoias en maléficas, de xeito que cando un humano as mira convértese en malvado. As Miracle Tunes terán que darse présa para recuperar todas as xoias, antes de que o mal triunfe e o mundo da música se extinga.