Cluster Audiovisual Galego

Noticias del Clúster

“Cuñados”, a primeira longametraxe de ficción de Portocabo, iniciará a súa rodaxe no mes de agosto

O próximo 17 de agosto dará comezo na cidade das Burgas a rodaxe de “Cuñados”, a primeira longametraxe de ficción da produtora socia do Cluster Portocabo. Esta comedia costumbrista e familiar, que xirará arredor das peripecias criminais de tres cuñados unidos polo azar e embarcados nun plan disparatado, estará protagonizada por tres grandes actores cómicos do país: Xosé A. Touriñán, Miguel de Lira e Fede Pérez, acompañados, entre outros, polas actrices Iolanda Muíños e Eva Fernández.

Este filme suporá o salto á longametraxe de Toño López que, tras dirixir exitosas ficcións seriadas internacionais como “Miracle Tunes” (Portocabo, ShowLab, Blasteem, Mediaset, Kamca Group) ou “Auga Seca” (Portocabo, Sp-i), asume nesta ocasión a dirección desta gran comedia galega. Nas súas palabras, “esta é unha comedia de case criminais, alegre, alborotada e vitalista para todos os públicos que basea o seu humor en facer leña das miserias humanas cun toque de tenrura e compaixón, e que tal vez nos sirva tamén para ver as nosas propias miserias e torpezas con máis sentido do humor”.

Ao fronte do resto do equipo técnico atópanse grandes profesionais do noso audiovisual como Alfonso Blanco (produción executiva), Araceli Gonda (guión), Santi Jul (música), Ana Míguez (dirección de produción), Jaime Pérez (dirección de fotografía), Lu Rodríguez (montaxe), Andrea Pozo (dirección artística) e Saturna (vestiario).

“Cuñados”, que se estreará en cines nos primeiros meses do 2021, forma parte do grupo de películas seleccionadas na segunda mesa de valoración de cine de RTVE para este ano e conta tamén coa subvención da Axencia Galega das Industrias Culturais (Agadic), a participación da TVG e a colaboración da Deputación de Ourense.

Esta non é a primeira vez que Portocabo escolle a provincia de Ourense para rodar algunha das súas ficcións, como xa ocorrera con “Vidago Palace” (Portocabo, Hop!), serie que xa pode verse en HBO Portugal e que chegará proximamente ao catálogo de HBO España. Alén disto, a produtora continuará tamén nestas semanas coa gravación da segunda tempada da multipremiada “Hierro” (Portocabo, Movistar+, Atlantique, Arte) en Canarias e avanzando en varios proxectos que se atopan agora mesmo en fase de desenvolvemento.

Filmarket Hub abre a convocatoria para Sitges Pitchbox 2020

Por sexto ano consecutivo, a plataforma Filmarket Hub e o Festival de Sitges únense para organizar Sitges Pitchbox, un evento internacional de pitching enfocado a proxectos de terror, ciencia ficción ou fantástico. Esta nova edición celebrarase de forma virtual e por primeira vez estará enfocada tanto a longametraxes internacionais como a series europeas en fase de desenvolvemento.

Os proxectos seleccionados terán a oportunidade de facer un pitch online e posteriormente ter reunións con empresas como Atresmedia Studios, El Estudio, Film Factory, Filmax, Gaumont, Globalgate Entertainment, Leonine, Lionsgate, Nadcon Film, Showrunner Films, Wild Bunch TV ou XYZ Films.

Adicionalmente, grazas á Deputación de Barcelona repartiranse catro premios en metálico destinados a gastos de desenvolvemento:

Premio para a mellor longametraxe: 5.000€

Premios para as dúas longametraxes finalistas: 1.000€ por proxecto

Premio para a mellor serie: 2.500€

A convocatoria permanecerá aberta ata o 3 de setembro, aceptaranse inscricións a través de mercado online de Filmarket Hub.

Máis información aquí: https://www.filmarkethub.com/calls/sitges-pitchbox-20

Sete novos proxectos cinematográficos contarán coa participación da CRTVG, dentro das accións de apoio ao audiovisual galego

CRTVG acordou este xoves a súa participación nun total de sete novos proxectos cinematográficos -dúas longametraxes, unha serie infantil de animación e catro películas documentais- en cumprimento das accións de apoio dos medios públicos ao sector audiovisual. Despois da avaliación realizada pola Comisión Directiva de Avaliación de proxectos da TVG, determinouse a participación da Corporación nesta selección de sete proxectos, dentro do coñecido como o cumprimento do 6%. Apoiar a creación no eido audiovisual e favorecer o sostemento dun sector audiovisual galego que busque tamén a mellora da sociedade son algúns dos criterios que se seguen neste proceso de selección.
    
A CRTVG vai apoiar a longametraxe ‘Proxecto Emperador’, producida pola socia Vaca Films e baixo a dirección de Jorge Coira, un ambicioso thriller cunha forte carga emocional e escrita co inconfundible estilo dun dos máis importantes guionistas do cine español, Jorge Guerricaechevarría (‘Cela 211’). A película conta cun sólido plan financeiro onde Netflix garante a dimensión internacional da película, á parte de contar cun potente plan de lanzamento cinematográfico.

Tamén foi seleccionada a película de animación ‘O meu avó’, de Caretos Film A.I.E, un proxecto stop motion realizado en coprodución con Portugal e Francia e para o cal máis de doce profesionais se afanaron en construír os monecos e elementos de atrezzo que se utilizarán na rodaxe. A película é un canto entrañable ao campo e ao pasado, á familia e ao lugar que ocupamos nun mundo tan cambiante.

 Ademais, a Corporación seleccionou unha proposta para o público infantil, a serie de animación ‘Trokers’, de 26 episodios e presentada pola socia A Fonsagrada Producións. En clave de comedia, esta serie presenta un gran desafío para a especie humana: colonizar Marte cos trokers, robots autopropulsados e multiferramenta que foron creados para acondicionar o planeta vermello e posibilitar a futura colonización.

E no apartado documental, a Galega acordou participar en catro novas producións, todas elas longametraxes:

Luz Fandiño, a poeta analfabeta’, unha proposta de Cósmica Producións, dirixida por Sonia Méndez, que ofrece un retrato desta muller, apoiándose nunha estrutura poliédrica que transitará entre a memoria histórica, a identidade cultural, a loita revolucionaria, a supervivencia e o refuxio da arte.

Obra e loita’, unha longametraxe documental de Primerbeat Producción, dirixida por Pablo Aldrey, que achegará a historia dun club modesto que conseguiu sobrevivir a base de traballo e de moita paixón. O proxecto ten ambición universal e parte de referencias documentais de grande éxito como a serie ‘30 for 30’, da canle ESPN, ou ‘OJ made in America’, gañador do Óscar da Academia do Cinema Americano, que se caracterizan pola súa clara compoñente humana.

A terceira longametraxe documental é ‘Os Botiforas’, produción de Casa de Tolos, un traballo musical e antropolóxico da man do investigador Xavier Blanco. Mediante a recreación de situacións cotiás de tempos pretéritos no rural de Galicia, a película revivirá aspectos como o ciclo anual de traballos agrícolas e o momento lúdico posterior a rematar estas tarefas.

Completa esta selección ‘A maraxe’, longametraxe documental dirixida por Pablo Chouza que bebe de referencias visuais como os documentais de Stacy Peralta, 'Dogtown' and 'Z-Boys' (2001). Xira arredor da paixón polo remo, paixón que lle deu a forza e o impulso necesario ao club de remo de Cabo de Cruz para inscribilo nas portadas da elite do remo en España.

“La isla de las mentiras”, de Paula Cons, é o título máis visto en Filmin na súa primeira fin de semana de estrea

“La isla de las mentiras”, ópera prima da socia Paula Cons, foi a película máis vista na súa primeira fin de semana de estrea en Filmin. A película, que chegou á plataforma o pasado 24 de xullo, está protagonizada por Nerea Barros, Darío Grandinetti, Aitor Luna, Victoria Teijeiro e Ana Oca. O filme está inspirado en feitos reais, concretamente no afundimento do buque “Santa Isabel” fronte ás costas da illa de Sálvora (Pontevedra) en 1921.

Tamén se presentou con grande éxito de público no Festival Internacional de Cine de Shanghái (SIFF), un dos festivais máis importantes de Asia e o único festival de China de clase A. Segundo a organización do certame, o aforo estaba completo e a proxección da película foi todo un éxito.

“La isla de las mentiras” é unha coprodución entre a produtora galega socia do Clúster Agallas Films, a vasca Historias del Tío Luis, a arxentina Aleph Cine e a portuguesa Take 2000. Conta coa participación de TVGRTVE e ETB, e co apoio de AGADICGoberno VascoICAAINCAA arxentino, ICA portugués e o Programa Ibermedia. Da súa distribución nacional e internacional ocúpase a socia Filmax.

Andrés Goteira finaliza en Santiago e Ferrol a rodaxe do documental “Welcome to ma maison” (“Benvidos á miña cabeza”)

O socio Andrés Goteira (“Dhogs”, 2017) reinicia hoxe en Santiago a rodaxe de “Welcome to ma maison” (“Benvidos á miña cabeza”), unha longametraxe documental con partes ficcionadas, que narra as desventuras de Igor Fernández, un actor que, tras un colapso emocional, decide afastarse da interpretación por un tempo e centrarse na investigación cinematográfica. Igor comeza a escribir un libro que versa sobre a linguaxe non verbal das mans na filmografía do director danés Nicolas Winding Refn (Drive). Dende aquela, o seu fin último na vida pasa do desexo de perdurar nas pantallas a encontrarse co seu idolatrado director, abrirse en canal con el e escribir un capítulo final para o seu libro.

Coa rodaxe da parte ficcionada do documental, que finaliza este xoves en Ferrol, Andrés Goteira completa unha viaxe real e figurada de Igor Fernández, na que mantivo encontros con distintos referentes seus, amigos do director danés e expertos cinematográficos, que reflexionan sobre a linguaxe xestual no cine e actuarán como ponte de unión entre ambos.

O documental producido por Gaitafilmes conta co apoio de Agadic, a Deputación de Lugo e a CRTVG.

“¿Qué hicimos mal?”, de Liliana Torres, finaliza a súa rodaxe en Barcelona

A semana pasada finalizou a rodaxe de “¿Qué hicimos mal?”, a película de Liliana Torres (“Family Tour”) producida poa socia Matriuska, Avalon P.C. e Miss Wasabi; co apoio de TVE, a Xunta de Galicia e TVG.

Rodada entre Galicia, Barcelona, Italia e México, o pasado mes de marzo a rodaxe tivo que interromperse temporalmente pola COVID-19. Finalmente, a longametraxe rematouse de rodar en Barcelona seguindo todas as medidas de seguridade.

“¿Qué hicimos mal?” é a historia dunha ficción construída sobre unha realidade que supón unha reflexión sobre os errores de guión da vida, cun tema central: a relación de parexa e a crise da mesma.

Sinopse

Lili tivo unha relación estable durante algúns anos. Aínda que todo semella funcionar entre a súa parexa e ela, hai unha infelicidade subxacente na súa vida cotiá que a alonxa de ser feliz. Liliana revisará o seu pasado para preguntarse: que fixemos mal?

A película está protagonizada pola propia directora e guionista Liliana Torres, Xulio Abonjo (“Fariña”, “María y los demás”), Héctor Carballo (“Servir y proteger”), Melania Cruz (“Dhogs”, “A Esmorga”) e Jorge Roldán (“Diana”); e ten prevista a súa estrea comercial para 2021.

Aberta a convocatoria para proxectos da 14ª edición do “I+P, Ideas para Producir”

Ata o 6 de outubro está aberto o prazo para inscribir proxectos audiovisuais na 14ª edición do pitching “I+P, Ideas para Producir”, que se celebrará os días 24 e 25 de novembro en Pontevedra. O Clúster Audiovisual Galego garantirá as medidas de protección persoal e distancia social fronte á Covid-19. 

O “I+P, Ideas para Producir” ten como obxectivo reunir a produtores, guionistas e directores que teñan un proxecto de cine ou televisión, e que busquen alianzas empresariais de cara á súa coprodución, venda ou distribución, con directivos de canles de televisión e plataformas, produtores executivos, distribuidores e responsables de vendas internacionais.  

Entre todos os traballos recibidos, un comité de expertos seleccionará 15 proxectos de cine e televisión para realizar, o día 25 de novembro, un pitch diante de destacados axentes do sector audiovisual. A continuación celebraranse os encontros one to one entre os produtores e creadores dos traballos e os expertos que asistan este ano ao Pitching. 

No caso de que chegado o momento as condicións existentes non permitiran realizar o pitching de maneira presencial, o Clúster Audiovisual Galego celebrará unha edición online do “I+P, Ideas para Producir” nas mesmas datas e informará deste cambio a todos os participantes. 

Os produtores e creadores interesados en participar nesta nova edición do I+P poden rexistrar os seus traballos ata o día 6 de outubro enviando o formulario de inscrición a comunicacion@clag.es. O Clúster comunicará a partir do día 30 de outubro os proxectos seleccionados. 

Na súa 14ª edición o “I+P, Ideas para Producir” conta co apoio da Xunta de Galicia, a través da Axencia Galega das Industrias Culturais (AGADIC) e o Instituto Galego de Promoción Económica (Igape), e do Concello de Pontevedra. Co patrocinio de Gadisa e Music Library & SFX, e a colaboración das asociacións CREA e AGAG, a plataforma Filmarket Hub e a Pontevedra Film Commission. 

Colaboracións CREA e AGAG 

Este ano, ademais da Asociación Galega de Profesionais da Dirección e Realización (CREA), tamén colabora co “I+P, Ideas para Producir” a Asociación Sindical Galega de Guionistas (AGAG). Estas colaboracións teñen como obxectivo favorecer a participación dos membros de CREA e de AGAG no pitching cunhas condicións preferentes. 

Así, o proxecto dos socios de ambas asociacións mellor valorado polo Comité de Selección entre todos os inscritos no “I+P, Ideas para Producir” terá acceso directo á xornada, gozando do mesmo desconto que os socios do Clúster Audiovisual Galego. No caso de haber máis proxectos de membros de CREA e AGAG seleccionados para participar na xornada, a estes aplicaránselles as condicións xerais. 

Descontos para socios de clústeres audiovisuais 

Como novidade nesta edición as empresas asociadas a algún dos clústeres audiovisuais do territorio español, e non só do Clúster Audiovisual Galego, tamén gozarán de descontos especiais para o “I+P, Ideas para Producir”.  

Presenza dos proxectos do I+P no catálogo de Filmarket Hub  

A plataforma online Filmarket Hub segue apoiando o “I+P, Ideas para Producir”. De maneira que as longametraxes e series seleccionadas para participar na 14ª edición do foro incluiranse no catálogo de Filmarket Hub e gozarán dun ano de inscrición gratuíta no mercado online que opera no continente europeo e en Latinoamérica. Deste xeito os proxectos contarán cun ano máis de maior visibilidade e difusión, aumentando as súas posibilidades de encontrar posibles coprodutores ou compradores e podendo acceder a outras empresas ademais das que participen no pitching.

Convocatoria "I+P, Ideas para Producir"

Formulario de inscrición "I+P, Ideas para Producir"

"O audiovisual galego, fainos grandes", nova campaña do Clúster para promocionar o sector

O Clúster Audiovisual Galego lanza unha nova campaña de promoción do sector. “O audiovisual galego, fainos grandes” pretende poñer en valor a forzaleza da industria audiovisual galega e todo o seu talento creativo. 

Galicia dispón dunha industria audiovisual sólida e competitiva. As empresas que integran o sector teñen unha ampla experiencia e apostan pola creatividade e a innovación en todos os seus produtos e servizos. Como resultado deste traballo ben feito, o audiovisual galego representa unha fortaleza económica e cultural para Galicia, e goza de recoñecemento a nivel nacional e internacional. 

A nova campaña, realizada por Bap & Conde, amosa algunhas das fortalezas do audiovisual galego, especialmente este ano de circunstancias extraordinarias no que cómpre resaltar todo o que o sector audiovisual ofrece ao conxunto da sociedade.  

Cun ritmo áxil e dinámico e cheo de positividade, o vídeo inclúe imaxes das distintas fases de desenvolvemento dunha obra, dos traballos máis recentes do noso audiovisual, da súa repercusión no mundo virtual ou dos logros conseguidos tanto polas producións como polos profesionais que as fan posibles. 

O Clúster proxectará o vídeo nos seus eventos e tamén nos mercados e festivais internacionais aos que asista co obxecto de contribuír á promoción e a difusión do audiovisual galego. Para realizar esta acción, contouse co apoio financeiro do Instituto Galego de Promoción Económica (Igape), a Xunta de Galicia e a Unión Europea, dentro do Programa Galicia Exporta Organismos Intermedios.  

Porque Galicia é máis forte tamén grazas ao audiovisual galego. O audiovisual galego, fainos grandes. 

Podes ver o vídeo aquí.

#OAudiovisualGalegoFainosGrandes

A CRTVG adquire sete documentais galegos dentro das medidas de apoio ao sector audiovisual pola COVID-19

Dentro do paquete de medidas de apoio ao sector audiovisual e creativo adoptadas pola CRTVG desde abril para contrarrestar os efectos da COVID-19 -axudas publicadas no Portal de Transparencia da CRTVG-, a Corporación seleccionou sete documentais en galego xa rematados, listos para a súa emisión na TVG.

O prazo para a recepción de propostas pechouse co rexistro de 80 proxectos de diversas temáticas e xéneros que foron estudados polo miúdo pola comisión de análise e avaliación. Esta comisión destacou a riqueza e calidade das propostas, que abordan un variado abano de motivos e perspectivas moi enraizadas na cultura e identidade galegas, e dun amplo espectro de temáticas: sociais, culturais, ambientais, etnográficas, de divulgación científica, de memoria histórica, etc.

O enfoque prioritario da selección foi detectar contidos que puidesen achegar valor engadido e complementasen o arquivo audiovisual da CRTVG, co afán de acrecentar así o seu patrimonio cultural e identitario. Prestando tamén especial atención a aqueles contidos de carácter atemporal, realizouse a seguinte selección de contidos documentais, gravados en HD e en lingua orixinal galega:   

• A noite irisada, dirixida por Bea Vázquez Campaña e producida por Recunchos de An&Ma, SLNE  no ano 2019. É un documental arredor dos procesos de reivindicación dos dereitos das persoas homosexuais.   

• O desafío do Sil, produción recente de Socialdocs, dirixida por Domingo D. Docampo. Este traballo contén imaxes de gran valor histórico sobre a construción das presas dos saltos do Sil (Santo Estevo e San Pedro) nos anos 50 e primeiros 60.   

• Estruturas, producido por Tingaralanga Audiovisual, é unha proposta documental dirixida por Paco Gallego e Xosé Bocixa enfocada nas agresións arquitectónicas á paisaxe, no que algúns chaman feísmo: a explotación forestal, as instalacións eléctricas, a actuación humana, o abandono do patrimonio, a obra inacabada, a especulación, etc.   

• Vigo, 1972 é un filme dirixido por Roi Cagiao que narra o acontecido na cidade de Vigo en setembro de 1972, cando o movemento de solidariedade co despedimento de cinco traballadores da factoría Citroën finalizou coa maior folga xeral da historia de Galicia en plena ditadura. É unha das poucas crónicas audiovisuais que reconstrúe aqueles feitos.

• 30 anos actuando, que nos quiten o bailado. Documental dirixido por Eva Alonso e producido por Chiripa Producións que narra, na voz dos propios protagonistas e doutros personaxes importantes relacionados con eles, a traxectoria de Eduardo Alonso e de Luma Gómez en relación coa súa compañía, pero ao mesmo tempo reflicte unha boa parte da historia do teatro galego, e inclúe imaxes de arquivo de gran valor patrimonial.  

• Costa da Morte, unha longametraxe documental de Lois Patiño que participou en festivais e se alzou con 15 premios, entre eles o Mestre Mateo da Academia Galega do Audiovisual, o premio Feroz Especial do ano 2015 ou o premio ao Mellor Director Emerxente do Locarno Film Festival,  por exemplo. Costa da Morte é un filme co selo de Zeitun Films onde o vento, a pedra, o mar, o lume son personaxes que achegan o misterio que supón a paisaxe.   

• A Compostela de La Casa de la Troya, curtametraxe documental de Arraianos Producións que ofrece unha visión sobre a Compostela que aparece na novela de Alejandro Pérez Lugín La Casa de la Troya, cen anos despois da publicación desta popular obra literaria de fama universal, onde interveñen, entre outros, Xerardo Estévez, Darío Villanueva, Xosé María Fonseca ou Anxo Angueira.

“La isla de las mentiras” participará no Festival Internacional de Cine Shanghái

“La isla de las mentiras”, ópera prima da socia Paula Cons, participará na 23ª edición do Festival Internacional de Cine de Shanghái (SIFF), un dos festivais máis importantes de Asia e o único festival de China de clase A. A película participará na sección oficial "Golden Globet Award" do certame. Trátase do primeiro festival de clase A que se celebra fisicamente trala pandemia.

O festival soe celebrarse en xuño, pero a crise do COVID-19 obrigou a postpoñelo e dará comezo o próximo 25 de xullo, prolongándose ata o 2 de agosto. Un día antes, o 24 dexullo, a película estrearase na plataforma Filmin.

“La isla de las mentiras” está dirixida por Paula Cons e protagonizada por Nerea Barros, Darío Grandinetti, Aitor Luna, Victoria Teijeiro e Ana Oca. A película está inspirada en feitos reais, concretamente no afundimento do buque “Santa Isabel” fronte ás costas da illa de Sálvora (Pontevedra) en 1921.

Sinopse

A madrugada do 2 de xaneiro de 1921, o buque Santa Isabel, con destino Bos Aires e 260 persoas a bordo, afúndese fronte á escarpada e dura costa da illa de Sálvora, en Galicia. A falta de homes na illa tres mozas locais, María (Nerea Barros), Josefa (Victoria Teijeiro) e Cipriana (Ana Oca), deciden ir ao rescate salvando a 48 persoas, un acto heroico que pagarán moi caro. Tras estes feitos, un xornalista arxentino, León (Darío Grandinetti), acude a Sálvora para cubrir a nova do naufraxio. Pouco a pouco irá descubrindo que esa noite se produciron demasiadas casualidades na illa, chegando incluso a sospeitar que o naufraxio puido ter sido provocado. Mentres tanto, xa nada será igual. O naufraxio sacudirá e cambiará para sempre a vida da illa.
 
“La isla de las mentiras” é unha coprodución entre a produtora galega Agallas Films, a vasca Historias del Tío Luis, a arxentina Aleph Cine e a portuguesa Take 2000. Conta coa participación de TVGRTVE e ETB, e co apoio de AGADICGoberno VascoICAAINCAA arxentino, ICA portugués e o Programa Ibermedia. Da súa distribución nacional e internacional ocúpase Filmax.