Cluster Audiovisual Galego

Noticias del Clúster

A película “La isla de las mentiras”, participada pola TVG, chega este venres día 2 ás salas de cine galegas

A longametraxe “La isla de las mentiras”, a ópera prima da directora galega Paula Cons, que conta coa participación da socia TVG, estréase este venres 2 de outubro en cines de toda Galicia. Despois de participar no Festival de Shangai, de exhibirse na sección “Made in Spain” de San Sebastián e de pasar tamén polo Festival de Cine Internacional de Ourense, esta fin de semana chega ás salas de 16 cidades e vilas galegas.

Con Nerea BarrosDarío GrandinettiAitor LunaVictoria TeijeiroAna Oca e María Costas nos papeis principais, a película foi rodada en 2019 e está inspirada libremente en feitos reais, no afundimento do buque Santa Isabel fronte ás costas da illa de Sálvora en 1921. Este é o punto de partida dun filme en que o máis interesante non é o naufraxio en si mesmo, senón as consecuencias que ten nun microcosmos tan pechado e peculiar coma o desta pequena illa. Tamén é unha homenaxe ás tres mulleres que salvaron a vida de 48 persoas e que foron inxustamente esquecidas pola historia.

“La isla de las mentiras” comeza a madrugada do 2 de xaneiro de 1921, cando o transatlántico Santa Isabel, con destino a Bos Aires e 260 persoas a bordo, se afunde fronte á escarpada e dura costa da illa de Sálvora. A falta de homes na illa, tres mozas, María, Josefa e Cipriana, deciden ir ao rescate, salvando case medio cento de persoas, nun acto heroico que pagarán moi caro. Tras estes feitos, León, un xornalista arxentino, acode a Sálvora para cubrir a nova do naufraxio. Pouco a pouco irá descubrindo que esa noite se produciron demasiadas casualidades, chegando mesmo a sospeitar que o naufraxio puido ser provocado. Mentres tanto, xa nada será igual. O naufraxio sacudirá e cambiará para sempre a vida da illa.


O filme, que se estreou o 24 de xullo a través da plataforma Filmin, unha das canles en liña de cinema independente máis prestixiosas, está coproducido pola galega socia do Clúster Agallas Films, a vasca Historias do Tío Luis, a arxentina Aleph Cine e a portuguesa Take 2000. Conta coa participación da TVG, RTVE e ETB e co apoio de AGADIC, Goberno Vasco, ICAA, INCAA arxentino, ICA portugués e o Programa Ibermedia.

Compromiso e apoio ao cine galego
    
Entre 2019 e 2020, a CRTVG participou en 26 longametraxes de ficción ou documentais cun investimento de 1 millón de euros.

Ademais do cine que se emite na canle de televisión, a Corporación desenvolveu este ano, durante o confinamento, unha nova liña de difusión do cine galego en aberto coa posta en marcha da chamada “Carteleira G” a través da web crtvg.gal. Esta oferta arrincou en marzo e ofreceu unha renovación de títulos semanal, debido á aposta da CRTVG por dar opcións para o entretemento naqueles momentos, e baséase en ciclos temáticos.  “Carteleira G” ofreceu ata agosto un total de 60 títulos que acadaron máis de 80.000 visualizacións. Desde o verán, o ciclo mantense en activo na web pero cunha periodicidade mensual.

O Festival de Cine de Ourense abre coa estrea de “Olvido y León”, de Xabier Bermúdez

No seu 25º aniversario, o Festival de Cine de Ourense estreou na súa gala de apertura un filme rodado na provincia, “Olvido y León”, do socio Xabier Bermúdez. A presentación da longametraxe, protagonizada por Marta Larralde, Guillem Jiménez e Monti Castiñeiras, é o punto final dun proceso que naceu baixo o paraugas do OUFF. A cinta comezou a rodarse o pasado ano durante a celebración do festival e este venres tivo a súa estrea mundial. Ribadavia, Laias ou Arnoia foron algúns dos escenarios escollidos para a gravación.

Durante a presentación do filme aos medios, o director ourensán agradeceu ao OUFF e a Deputación a súa labor xa que “por medio deles puiden rodar integramente en Ourense, o que é para min é un desexo feito realidade.” O cineasta estivo acompañado na presentación por Aurelio Gómez Villar e Miguel Anxo Fernández, directores técnicos e artísticos do festival, respectivamente, e que tamén lle quixeron agradecer a Xavier Bermúdez o feito histórico de estrear no festival e ademais inauguralo cunha película totalmente ourensá.

Unha continuación moi agardada

“É un pracer e unha honra mostrar por primeira vez a película aquí en Ourense” afirmou Bermúdez, que confirmaba que “os seguintes pasos son unha incógnita. Estamos esperando a ver que pasa xa que moitos festivais están cancelándose pola pandemia. Se temos que esperar a 2021, esperaremos”. O filme é a secuela dun dos grandes éxitos do cinema español, premiado internacionalmente en 11 ocasións e que, sen dúbida, converteu a Xabier Bermúdez nun referente.

Na continuación de “León y Olvido” (2004) coñecemos a evolución da vida destes dous irmáns e como se desenvolven na actualidade. “Pasaron 16 anos, Marta e Guillem cambiaron pero segue habendo maxia entre eles. Ademais, nestes anos mantiveron unha relación boísima entre eles” confirmaba o director sobre os protagonistas.

Bermúdez e o OUFF

A vinculación de Bermúdez co festival exténdese ata a primeira edición na que colaborou. Un ano despois, en 1997, estrea “Nena” fóra de concurso, foi membro do xurado da competición internacional no ano 2000 e Premio ao Mellor Director en 2004. Ademais de recibir o Premio de Honra do Festival Internacional de Cine de Ourense no 2018.

Xabier Bermúdez conta cunha ampla traxectoria no sector audiovisual. Como produtor, en 1994 funda, xunto con Manane Rodríguez e Luís M. Fernández, a produtora Xamalú Filmes na Coruña, e como director, con seis longametraxes de ficción e dúas longametraxes documentais para televisión, “Altas Capacidades” (2013) e “O soño de papá” (2018). Como guionista ten colaborado en proxectos como “Migas de Pan”, (2016), de Manane Rodríguez, seleccionada para participar nos nomeamentos aos Premios Óscar e aos Globos de Ouro. En 2004 recibiu nos festivais internacionais de Karlovy Vary e Ourense o Premio ao Mellor Director. En 2004 en Toulouse e en 2014 en Calanda foille entregado o Premio ao Mellor Guión.

Executivos de cine e televisión participarán na 14ª edición do "I+P, Ideas para Producir"

O “I+P, Ideas para Producir” confirmou ata o momento a participación de máis dunha ducia de canles de televisión, plataformas, distribuidoras e produtoras en busca de novas ideas e produtos audiovisuais. Organizado polo Clúster Audiovisual Galego, o evento celebrarase os días 24 e 25 de novembro en Pontevedra, garantindo todas as medidas de protección persoal e distancia social fronte á Covid-19.                                                                              

A xornada de presentación de proxectos audiovisuais e encontros one-to-one terá lugar o 25 de novembro e contará coa asistencia de executivos do departamento de Programas de Ficción de Mediaset España ou da Área de Contidos de Euskaltel-R e Televisión de Galicia. Tamén asistirán ao encontro o subdirector de Ficción de TVE, Javier García; a vicepresidenta das canles de Cine e Documentais de AMC Networks, Pilar de las Casas; o encargado de Selección e Desenvolvemento de Ficción de Movistar+, Rafael Taboada, ou Lara López, de Compra de dereitos audiovisuais de Cine Español e Independente en Movistar+; o xefe de Ficción e Cine de TV3, Oriol Sala-Patau, e a directora de Contidos de Aragón TV, Natalia Martínez, entre outros. 

No “I+P, Ideas para Producir” estarán ademais a delegada de Filmax en Galicia, Inmaculada Castaño; o responsable de Vendas de DeAPlaneta, Cristian Caggiano, e o de Produción e Cine Español de A Contracorriente Films, Fernando Riera; a coordinadora xeral de Treeline Distribution, Elena Mera, así como executivos da produtora Portocabo. 

Tal e como xa se avanzou ao abrir a convocatoria, se no seu momento as condicións existentes non permitisen realizar o pitching de modo presencial, o Clúster Audiovisual Galego celebrará unha edición online do “I+P, Ideas para Producir” nas mesmas datas. 

Rexistro de proxectos 

As empresas e os profesionais do audiovisual interesados en participar nesta xornada poden inscribirse ata o día 6 de outubro. Para elo teñen que enviar o formulario que encontrarán na páxina web do Clúster (www.clusteraudiovisualgalego.com). A partir do día 30 de outubro a organización comunicará aos seus responsables os proxectos seleccionados para participar no pitching. 

Neste 2020 o “I+P Ideas para Producir” conta co apoio da Xunta de Galicia, a través da Axencia Galega das Industrias Culturais (AGADIC) e do Instituto Galego de Promoción Económica (Igape), e do Concello de Pontevedra. Coa colaboración das asociacións CREA e AGAG, da plataforma Filmarket Hub e da Pontevedra Film Commission, e co patrocinio de Gadisa e das compañías Music Library & SFX e Cinetools. 

Colaboración con Filmarket Hub 

A plataforma online de proxectos cinematográficos Filmarket Hub mantén a colaboración co “I+P Ideas para producir” apoiando os traballos que se presenten no foro. De maneira que as longametraxes e as series desta 14ª edición gozarán dun ano de inscrición gratuíta no mercado online da plataforma, onde poderán potenciar a súa visibilidade e conectar con toda unha rede de produtores e empresas de Europa e Latinoamérica.

A película "Cuñados", ‘a gran comedia galega’, finaliza a súa rodaxe en Ourense

A produtora socia do Clúster Portocabo ramatou a rodaxe de "Cuñados", que se levou a cabo durante as últimas semanas en distintas localizacións da provincia de Ourense. Esta comedia familiar, que xira arredor das peripecias criminais de tres cuñados unidos polo azar e embarcados nun plan disparatado, está protagonizada por tres grandes actores cómicos galegos: Xosé A. Touriñán, Miguel de Lira Fede Pérez, acompañados, entre outros, polas actrices Eva FernándezIolanda MuíñosMaría Vázquez Mela Casal.

O produtor executivo e director de Portocabo, Alfonso Blanco, quixo destacar a colaboración de todas as entidades que participaron neseta rodaxe, así como a implicación de todo o equipo e provedores, e agradece aos veciños e veciñas de Ourense “o gran trato recibido nos distintos lugares onde se filmou "Cuñados"”. Paisaxes da comarca do Ribeiro e de Allariz, xunto a San Cibrao das Viñas e a propia cidade das Burgas foron os escenarios desta longametraxe ambientada no mundo das bodegas vinícolas ourensás.

"Cuñados" supón o salto á longametraxe de Toño López, quen, tras dirixir exitosas series como “Auga Seca”, “Luci” ou “Matalobos”, asume nesta ocasión a dirección desta gran comedia. Á fronte do resto do equipo técnico encóntranse grandes profesionais do audiovisual galego como Alfonso Blanco (produción executiva), Araceli Gonda (guión), Santi Jul (música), Ana Míguez (dirección de produción), Jaime Pérez (dirección de fotografía), Lu Rodríguez (montaxe), Andrea Pozo (dirección artística) e Saturna (vestiario).

"Cuñados", que se estreará en cines en 2021, forma parte do grupo de películas seleccionadas na segunda mesa de valoración de cine de RTVE para este ano e conta tamén con subvención da Axencia Galega das Industrias Culturais (Agadic), coa participación da socia TVG e coa colaboración da Deputación de Ourense. A distribución correrá a cargo da socia Filmax, que tamén xestionará as vendas internacionais.

Este verán a produtora finalizou así mesmo a gravación da segunda tempada da multipremiada coprodución televisiva “Hierro” (Portocabo, Movistar+, Atlantique, ARTE) en Canarias, ao tempo que se encontra avanzando en varios proxectos en fase de desenvolvemento.

"La isla de las mentiras" presentarase no Festival de San Sebastián e estrearase en cines de Galicia o 2 de outubro

O vindeiro luns 21 de setembro presentarase "La isla de las mentiras", ópera prima da socia Paula Cons, na 68 edición do Festival de San Sebastián (SSIFF). A película poderá verse en Made in Spain, unha sección non competitiva que integra os títulos máis significativos do cine español deste ano. “La isla de las mentiras”, que xa pode verse en Filmin, chegará aos cines de Galicia o 2 de outubro.

O Festival de San Sebastián será o segundo festival de Clase A no que se poida ver "La isla de las mentiras" tras participar na sección oficial do Festival Internacional de Cine de Shanghái (SIFF).

"La isla de las mentiras" estreouse o pasado 24 de xullo en Filmin e foi o título máis visto na plataforma na súa primeira fin de semana de estrea e un dos tres máis vistos no mes de agosto.

A película está dirixida pola galega Paula Cons e protagonizada por Nerea Barros, Darío Grandinetti, Aitor Luna, Victoria Teijeiro e Ana Oca. A película está inspirada en feitos reais, concretamente no afundimento do buque “Santa Isabel” fronte ás costas da illa de Sálvora en 1921.

Sinopse

Inspirada en feitos reais. A madrugada do 2 de xaneiro de 1921, o buque Santa Isabel, con destino Bos Aires e 260 persoas a bordo, afunde fronte á escarpada e dura costa da illa de Sálvora, en Galicia. A falta de homes na illa tres mozas locais, María (Nerea Barros), Josefa (Victoria Teijeiro) e Cipriana (Ana Oca), deciden ir ao rescate salvando a 48 persoas, un acto heroico que pagarán moi caro. Tras estes feitos, un xornalista arxentino, León (Darío Grandinetti), acude a Sálvora para cubrir a nova do naufraxio. Pouco a pouco irá descubrindo que esa noite se produciron demasiadas casualidades na illa, chegando incluso a sospeitar que o naufraxio poido ter sido provocado. Mentres tanto, xa nada será igual. O naufraxio sacudirá e cambiará para sempre a vida da illa.

"La isla de las mentiras" é unha coprodución entre a produtora galega socia do Clúster Agallas Films, a vasca Historias del Tío Luis, a arxentina Aleph Cine e a portuguesa Take 2000. Conta coa participación de TVGRTVE e ETB, e co apoio de AGADICGoberno VascoICAAINCAA arxentino, ICA portugués, o Programa Ibermedia, Concello de Riveira e Deputación da Coruña. Da súa distribución nacional e internacional ocúpase a socia Filmax. 

45 dos 50 programas máis vistos este verán en Galicia foron da TVG

Neste verán, no período comprendido entre o 1 de xullo e o 10 de setembro, os contidos da TVG seguiron a gañar audiencia e superan as cotas acadadas en 2019. Un dos datos máis espectaculares é que no ránking dos 50 programas de maior audiencia, 45 foron emisións da TVG. O labor de servizo público da Televisión de Galicia durante esta pandemia ten o seu reflexo na fidelidade da xente. A  CRTVG trasladou a todos os galegos a actualidade máis relevante e mantivo en pé a súa oferta de entretemento en directo. 

Deste xeito, os informativos da Galega foron os máis seguidos, destacando a franxa do mediodía, entre as 13:30 e as 15:30 horas, con “Galicia noticias” e “Telexornal Mediodía”, e na que se acadou unha cota de luns a venres do 20,3% de audiencia, superando amplamente os competidores Antena 3, cun 15,1%; Tele5, cun 12,4%; La Sexta, cun 11,6%; La1, cun 4.1%; e Cuatro, cun 3,5%. 

Pero tamén hai que salientar a resposta á oferta de entretemento do prime time, que aumentou en 7 décimas respecto aos mesmos meses no ano pasado. Entre os mozos de 13 a 24 anos, a TVG é, dentro das canles xeneralistas, a máis vista, cunha cota media mensual do 8,4%.

O actor Celso Bugallo porá a súa voz na película de animación “Os Demonios do Meu Avó”

O actor galego Celso Bugallo, gañador dun premio GOYA pola súa actuación na película “Mar adentro” de Alejandro Amenábar, porá a súa voz a un dos personaxes da película de animación stop-motion “Os Demonios do Meu Avó” da socia Parrocha Studio. Será os días 15 e 16 de setembro en Lisboa.

“Os Demonios do Meu Avó” conta a historia de Rosa, unha muller na trintena que se rencontra coas súas orixes a través das cartas e enigmas que lle deixa o seu avó recentemente falecido, e que a irán guiando por un mundo poboado por criaturas fantásticas e animais silvestres.

Ademais de Celso Bugallo, tamén participan nas voces do filme importantes actores portugueses e os galegos Isabel Naveira ou Luis Iglesia.

Dirixida por Nuno Beato, a película é unha coprodución internacional na que están involucradas produtoras de Galicia (Parrocha Studio), País Vasco (Basque Films), Francia (Marmita Films) e Portugal (Sardinha em Lata).

Á fronte da produción en Galicia está o socio Xosé Zapata, promotor da firma ParrochaStudio situada no centro de Arteixo e que está adicada á fabricación de bonecos para películas stop-motion. Xosé Zapata é un recoñecido produtor con máis de vinte anos de experiencia no sector e que destaca pola súa participación en obras de animación como “Buñuel no laberinto das tartarugas”.

“Os Demonios do Meu Avó” conta coa participación de Televisión de Galicia e o apoio da Axencia Galega das Industrias Culturais (AGADIC) da Xunta de Galicia, así como do Ministerio de Cultura-ICAA de España, ICA-Portugal e do CNC de Francia.

O produtor galego Xosé Zapata, elixido membro da Comisión de Especialidade de Documental da Academia de Cine

O sábado 12 de setembro celebráronse eleccións para elixir aos novos membros das Comisións de Especialidade da Academia de Cine. O produtor galego socio do Clúster Xosé Zapata foi elixido como novo membro da Especialidade de Documental, xunto a Valèrie Delpierre (vogal) e Diego Mas Trelles. Xosé Zapata será tamén o primeiro substituto da vogal na Xunta Directiva da institución.

Renóvanse así a metade dos compoñentes da Xunta Directiva da Academia de Cine, formada por dous vogais por cada unha das quince especialidades, un presidente e dous vicepresidentes.

Xosé Zapata agradeceu a confianza dos seus compañeros e o apoio recibido nas votacións, e abriuse a calquera iniciativa que teña como obxecto “mellorar e facer entre todos que o cine documental sexa recoñecido e distribuído como se merece”.

O produtor galego tamén manifestou que traballará xunto aos sues compañeiros de especialidade para conseguir “un cine español máis forte e diverso”. 

O Clúster Audiovisual participará o día 17 nas Mesas de Diálogo sobre a automatización e a dixitalización que organizan o IGAPE e a USC

O xoves 17 de setembro, ás 16:30 horas, celebrarase de maneira virtual (a través da plataforma Zoom) unha das Mesas de Diálogo para analizar o impacto e as perspectivas da automatización e a dixitalización nos sectores económicos de Galicia que organizan o IGAPE e a USC e na que participará o Clúster Audiovisual Galego.  

Esta iniciativa enmárcase no estudo sobre as posibilidades de automatización nos sectores e subsectores económicos de Galicia considerando tamén o impacto da COVID-19, que está a realizar o IGAPE en colaboración coa USC no marco do Convenio para a Análise do Impacto da Automatización na Economía Galega.   

Entre os panelistas da Mesa do día 17 estarán o noso Presidente, Jorge Algora, e o Vicepresidente responsable de Contidos Dixitais, Manuel Meijide, xunto ao Presidente do Clúster Turismo de Galicia, Cesáreo González, e Alberto Garnil por parte do Clúster da Comunicación de Galicia. Representantes do IGAPE e da USC moderarán a Mesa. 

Co obxectivo de analizar o grao de dixitalización e automatización do noso sector e as perspectivas de futuro, na Mesa abordaranse asuntos como a situación actual do audiovisual, o impacto da pandemia da COVID-19 e en que medida a dixitalización ou a automatización poden axudar á súa recuperación económica, o grao de dixitalización do sector, posibles dificultades e o impacto destes procesos no emprego, entre outros. 

Para asistir á sesión podedes rexistrarvos neste enlace.

AGAG incorpórase ao Clúster Audiovisual Galego como socio colaborador

A Asociación Sindical Galega de Guionistas (AGAG) vén de incorporarse ao Clúster Audiovisual Galego como socio colaborador. Esta adhesión é froito do convenio de colaboración asinado entre ambas entidades co obxectivo de unir esforzos e estreitar as súas relacións, intercambiar coñecementos e realizar actividades destinadas á promoción e difusión do sector audiovisual e á posta en valor dos profesionais galegos. 

Así, esta colaboración xorde do interese común por parte de ambas entidades por realizar actividades que sirvan para promocionar e impulsar o traballo dos guionistas e do sector audiovisual galego en xeral. 

A incorporación de AGAG ao Clúster Audiovisual Galego como socio colaborador enmárcase na liña de actuación que vén desenvolvendo o Clúster nos últimos anos para lograr a cooperación e a integración de empresas e entidades pertencentes á cadea de valor do sector audiovisual e dos contidos dixitais, co obxectivo de mellorar a súa competitividade e de promocionar este sector. 

Sobre AGAG 

AGAG é unha asociación profesional sen ánimo de lucro fundada no ano 1997, que ten como obxectivo principal a defensa dos intereses dos guionistas do sector audiovisual en Galicia. 

Entre os seus fins principais está a representación, defensa e promoción dos intereses comúns dos seus afiliados no ámbito laboral, profesional, social, económico e cultural, así como dos intereses xerais da profesión fronte as administracións, institucións, empresas e outros colectivos de ámbito autonómico, estatal e internacional. 

Tamén están entre os cometidos de AGAG a difusión social e cultural da profesión de guionista e a súa tarefa, a organización de actividades formativas e culturais para os seus afiliados, o fomento da solidariedade dos seus membros promocionando e creando servizos comúns de natureza asistencial e a realización de accións axeitadas para conseguir melloras sociais e económicas para os afiliados.