Cluster Audiovisual Galego

Noticias del Clúster

O Clúster Audiovisual celebra o 14 de decembro a 2ª edición do Pitching TFG, na que colabora R mediante o seu programa de apoio á innovación e as iniciativas emprendedoras 

O Clúster Audiovisual Galego celebrará este venres, día 14, en Santiago, a 2ª edición do Pitching TFG na que conta, este ano, coa colaboración especial da compañía R, mediante o seu programa startups R, a través do cal o operador galego de telecomunicacións se relaciona coa comunidade do audiovisual e doutros sectores para impulsar a innovación e as iniciativas emprendedoras.

No marco da súa colaboración co Pitching dos Traballos Fin de Grao, startups R invitará aos mellores proxectos da xornada a participar nun obradoiro de emprendemento que terá lugar no espazo startups R, na Cidade da Cultura, en febreiro de 2019. Neste obradoiro, os participantes recibirán formación para mellorar as súas presentacións tipo Pitch e definir o modelo de negocio das súas propostas.

Pitching TFG 2018

Na segunda edición do Pitching TFG, o Clúster Audiovisual conta de novo co apoio da Xunta de Galicia a través do Igape, e coa colaboración das Universidades da Coruña, Vigo e Santiago de Compostela por medio das súas facultades de Comunicación Audiovisual, así como de Abanca Obra Social.

Este ano presentaranse un máximo de 18 traballos, seleccionados polas entidades académicas, ante unha ducia de empresas do audiovisual e do sector TIC galegas mediante a técnica do pitching. Os proxectos están en diferentes fases de desenvolvemento e inclúen variedade de formatos, tanto de cine e televisión, como dixitais. Durante a xornada, os alumnos terán a oportunidade de testar os seus traballos coas empresas participantes, e poderán coñecer as súas valoracións respecto das propostas presentadas.

O  Pitching TFG inclúe, como novidade nesta edición, un speed dating no que o representante de cada proxecto disporá de 3 minutos para falar con cada unha das empresas participantes. Estes encontros teñen como finalidade promover a relación entre os autores dos proxectos e as empresas, facilitando un contacto directo no que os alumnos poidan aportar información adicional e os produtores, etc. a súa opinión sobre o proxecto, ademais de facilitar a posible continuidade futura do contacto entre ambos.

As empresas interesadas en participar nesta segunda edición do Pitching TFG poden confirmar a súa asistencia a través do mail comunicacion@clag.es ou cluster@clag.es ata o mércores 12 de decembro.


Convocatoria

Programa provisional

En rodaxe “Te quiero, imbécil”, comedia romántica protagonizada por Quim Gutiérrez e Natalia Tena

Desde o pasado 19 de novembro Laura Mañá roda a súa nova longametraxe, a comedia romántica "Te quiero, imbécil", protagonizada por Quim Gutiérrez e Natalia Tena, que Filmax estreará en 2019. 

A película, producida por Brutal Media, Lastor Media e Minoría Absoluta, está protagonizada por Quim Gutiérrez, Natalia Tena, Alfonso Bassave, Alba Ribas e Patricia Vico; conta tamén coa colaboración especial de Ernesto Alterio. O filme rodarase en diferentes localizacións de Barcelona e Pamplona.

Sinopse

A Marcos déixao a moza xusto cando lle iba pedir que casara con el, bótano do traballo e ten que ir vivir cos seus pais. En definitiva, a súa vida é o que se pode definir como unha merda.  Con semellante panorama, Marcos decide saír adiante como o home que é. O problema, é que Marcos non ten nin idea de como é un home do século XXI, así que acode ao lugar onde todo se encontra: Internet. Mentres comeza a poñer en práctica os pasos que encontra nun videoblog de autoaxuda para superar a súa rutura e buscar ao home que leva dentro, Marcos encontrarase cunha antiga amiga do colexio á que non ve desde hai 20 anos.

A serie de Portocabo “Vidago Palace” chega a Estados Unidos

A serie “Vidago Palace”, producida pola socia Portocabo, regresa de Cannes tralo seu paso polo MIPCOM, o mercado de televisión máis importante do mundo, onde acaba de conseguir as súas primeiras vendas internacionais. A coprodución galego-portuguesa poderá verse en Estados Unidos da man da canle de televisión por cable Acorn TV, o servizo máis popular de streaming con contidos británicos e internacionais. Deste xeito, “Vidago Palace” convértese na primeira serie rodada en galego e portugués que será emitida no territorio norteamericano.

Esta non é a única venda que obtivo a ficción, que tamén se poderá ver na televisión de Polonia a través da canle pública Telewizja Polska. A distribuidora encargada de negociar a venda de dereitos da ficción, Banijay Rights, confirma que este é soamente o comezo do que se prevé como un próspero percorrido internacional.

O drama romántico “Vidago Palace” é a primeira serie coproducida entre TVG e RTP, as dúas canles públicas de Galicia e Portugal. Producida por Portocabo en colaboración coa produtora portuguesa Hop!, narra unha historia de amor imposible entre unha moza e un mozo de distintas clases sociais en pleno inicio da Guerra Civil e no idílico entorno do hotel de luxo Vidago Palace. A serie, emitida na primavera de 2017 cunha boa recepción en ambos territorios, forma parte dun acordo para establecer unha liña de produción entre ambas canles. Un acordo que sen dúbida se verá reforzado polo éxito de vendas de “Vidago Palace”.

A CRTVG participa en 9 novos proxectos cinematográficos, dentro das accións de apoio ao sector audiovisual

CRTVG acordou a súa participación nun total de nove novos proxectos cinematográficos, que comprenden a realización de seis longametraxes, dúas delas de animación, dunha película para televisión e de dous documentais, en cumprimento das accións de apoio dos medios públicos ao sector audiovisual. Dos nove proxectos, catro son de socios do Clúster Audiovisual Galego: “A Galiña Turuleca”, de Producións A Fonsagrada (Grupo Filmax); “Olvido e León”, de Xamalú Filmes; Que fixemos mal?, de Matriuska Producciones, e “A-Cero-5”, de Agallas Films.

Comezando polos proxectos de animación, “A Galiña Turuleca” é unha coprodución internacional coa Arxentina, dirixida a un público infantil e producida por Producións A Fonsagrada. Parte do seu equipo creador participou en “Pérez, o ratiño dos teus soños”, premiada co Goya á mellor animación, e cómpre salientar tamén que a dobraxe conta con recoñecidas voces do audiovisual galego. Pola súa banda, “Unicorn Wars” é unha longametraxe para adultos, que ofrece unha historia de fantasía bélica baseada no persoal universo do emerxente director Alberto Vázquez, e que mestura humor, drama e mitoloxía. 

O thriller “Quen a Ferro Mata”, con Luís Tosar como protagonista, é unha proposta de Vaca Films, rodada en Galicia e dirixida por Paco Plaza. Trátase dunha historia de traizóns, drogas, dramas familiares e violencia.

O novo proxecto de Ignacio Vilar é a longametraxe “María Soliña”, onde o director aborda unha das cuestións máis universais do ser humano: o paso da adolescencia á idade madura.

“Olvido e León” é un filme, de Xamalú Filmes, que conta como protagonistas, ao igual que na premiada “León e Olvido”, con persoas con síndrome de Down.  

Outra coprodución internacional, con México e Bélxica nesta ocasión, é “Que fixemos mal?”, de Matriuska Producciones e a segunda película de Liliana Torres. Un drama con toques de humor, cun grande acento feminino, arredor dun tema universal como é o das relacións persoais e os compromisos sentimentais na sociedade actual.

A Galega acordou tamén participar na tv-movie “A Máscara”, presentada por Maruxiña Films. Co selo do director Alfonso Zarauza coñecerase unha inquietante historia, inspirada nun tema clásico do misterio da cultura galega e tamén na tradición europea e americana do terror gótico e que transcorre nunha aldea dos Ancares.  

No apartado documental, a TVG apoiará a realización de “A-Cero-5” que, producido por Agallas Films, xorde como terapia persoal na busca de respostas despois dun traumático accidente sufrido polo propio director, Gonzalo Suárez. E tamén Clown’s Planet”, en que Sun Lúa Producións producirá unha película documental chea de humor branco e esperanza para o mundo.

Finalmente, a CRTVG obtivo tamén os dereitos de explotación de dúas producións cinematográficas das que xa adquirira os dereitos de comunicación pública na resolución de 2017: “Dhogs”, da socia Gaitafilmes, e Longa Noite”.

R presenta a aceleradora de contidos dixitais Startups R DiCo Challenge

R e a AMTEGA (Axencia para a Modernización Tecnolóxica de Galicia) colaboran no desenvolvemento do programa startups R_DICo Challenge  polo que o operador galego se converte en aceleradora de contidos dixitais. A idea é rendibilizar a medio prazo esas solucións que xurdan da aceleradora e axudalas a atopar unha saída áxil e eficaz no mercado, mesmo conR como primeiro cliente.

A aposta de R consiste en abrirse ao ecosistema de emprendedores, empresas e outras entidades da contorna dos contidos dixitais para colaborar con eles no desenvolvemento de proxectos innovadores que poidan, por unha banda, solucionar os retos de innovación da compañía e, polo outro, enriquecer o tecido empresarial galego dos contidos dixitais.

Práctico e directo

O de DiCo Challenge é un enfoque práctico e directo. Trátase, en esencia, de colaborar para resolver problemas relevantes e específicos, e de que os proxectos participantes atopen un lugar no mercado. É por iso que a fase de aceleración ten unha duración de tan só catro meses e que se utiliza unha metodoloxía de apoio aos proxectos de emprendemento centrada en facer un uso eficiente dos recursos e obter unha validación temperá co mercado.

Os obxectivos esenciais do programa son a xeración de emprego, o fomento do emprendemento e o empurre á innovación tecnolóxica a través do apoio a emprendedores e empresas novas ou consolidadas, relacionadas co ámbito dos contidos dixitais, de dentro ou mesmo de fóra da comunidade e do Estado, se é o caso.

Retos e selección dos proxectos

O programa comezará co lanzamento de 5 retos tecnolóxicos, un deles patrocinado pola Televisión de Galicia, que nos próximos días se poderán consultar na web da aceleradora (www.startupsR.com). Un comité de avaliación seleccionará, nunha primeira fase, 20 candidatos do total de participantes que se presenten, e nunha segunda fase elixiranse os 5 proxectos definitivos.

Alfredo Ramos, director xeral de R salientou que a idea é “canalizar o talento e os proxectos innovadores, fomentar o emprendemento e que o sector poida aproveitar todo ese potencial para mellorar os seus produtos e servizos”.

Mar Pereira, directora da Axencia para a Modernización Tecnolóxica de Galicia puxo o acento na importancia desta “iniciativa do programa DiCo Mindset da Xunta, coa que se procura primeiramente xerar emprego no sector, animar a emprededores e potenciar a innovación tecnolóxica en Galicia para fornecer un mercado en alza e competir a todos os niveis dentro e fóra da comunidade”.

Mentor, instalacións e axudas

Entre as temáticas de retos e proxectos haberanos tan variados coma o gaming, publicidade e marketing, novos contidos e experiencias, formación innovadora, realidade virtual e aumentada, modelos de negocio, Internet das Cousas (IoT) e Intelixencia Artificial (IA), contidos sociais, apps Android, seguridade e propiedade, contidos enriquecidos, distribución, audiovisual…

Os seleccionados recibirán sesións formativas durante varios meses e terán, ademais, á súa disposición, cadanseu mentor e a axuda económica da AMTEGA para afrontar os gastos cotiáns durante o desenvolvemento dos proxectosAo tempo, os 5 retos seleccionados no programa startups R_DiCo Challenge, que poderán utilizar o espazo startups R habilitado na Cidade da Cultura, traballarán man a man con R e terán acceso á súa infraestrutura e modelo de negocio, recibirán a formación e o acompañamento permanente dos mentores e titores de R e beneficiaranse do uso das instalacións e a visibilidade derivada de camiñar a carón do operador galego durante este tempo. Ao final, e tras a mutua aprendizaxe, os elixidos terán en R un potencial primeiro cliente e un trampolín para outras saídas comerciais ao mercado.

Ao remate desta primeira edición do programa, no mes de xuño-xullo de 2019 desenvolverase unha xornada-demo para analizar o resultado destes meses de traballo e a materialización dos proxectos.

Toda a información e a convotaria estará dipoñible a próxima semana en startupsr.com/dico-challenge

Televisión de Galicia foi a canle máis vista nos últimos dous meses, segundo o Estudo Xeral de Medios

Televisión de Galicia acadou unha cota de pantalla de 12,5% no período de luns a domingo nos meses de outubro e novembro, segundo o EXM (Estudo Xeral de Medios) que corresponde á terceira onda do ano 2018.

Este resultado sitúa a TVG como a canle máis vista en Galicia neste período de tempo. Por días, os sábados foron o día de maior fortaleza da TVG, cun 18,5%, seguidos polos xoves (14,1%) e os domingos (13,6%). 

Con respecto ao prime time, a cota media desta faixa foi dun 12%, superando esta media, tamén, os xoves, sobre todo cos bos datos de audiencia que xera o programa “Land Rober Tunai Show”, sábados, con“Bamboleo”, e domingos, con “Serramoura” e “En xogo”. No conxunto do día, a media da TVG neste período de 2018 foi de 12,5%, aumentando nos horarios de sobremesa (13.30-17:00 h.) ata o 19,6%.

Segundo o EXM, no ano móbil que vai de febreiro a novembro, a Televisión de Galicia acadou de luns a domingo unha cota de pantalla de 14,6%, mentres que de luns a venres a media estableceuse nun 14,4%. Neste espazo de tempo a faixa do prime time da TVG foi de 12,9%.

Novos encontros do Clúster Audiovisual Galego no marco dos Obradoiros de Dixitalización Industria 4.0

Novos encontros do Clúster Audiovisual Galego no marco dos Obradoiros de Dixitalización Industria 4.0

Co obxectivo de dar continuidade aos Obradoiros de dixitalización na Industria 4.0, organizados polo Clúster Audiovisual Galego, en colaboración co Clúster TIC Galicia e co apoio do IGAPE, este luns celebráronse en Santiago unha serie de novos encontros de cara a profundar no proceso de dixitalización do sector ao redor de temáticas como a implantación dun sistema de xestión integral adaptado ás características das empresas do audiovisual galego, o deseño dunha plataforma de entrega e validación de contidos audiovisuais ou a xeración de contidos en realidade virtual, contando coa implicación de diversos provedores e clientes, como a TVG.

Empresas dos sectores audiovisual e TIC, como Abinco Digital, Adiviña Producións, Anubía Soluciones en la Nuebe, Cinfo, Enxendra Technologies, Ficción Producciones ou Voz Audiovisual, participaron o luns 26 nestes novos encontros, que arrancaban o pasado mes de setembro coa posta en marcha dos Obradoiros de dixitalización na Industria 4.0. Entre os meses de setembro e novembro, o Clúster Audiovisual celebrou varias sesións co obxectivo de intercambiar coñecementos e experiencias entre os participantes que permitan artellar futuros proxectos nas áreas que abordaron os obradoiros.

O Clúster Audiovisual Galego participará na 23ª edición do Festival de Cine Internacional de Ourense (OUFF)

O sábado 1 de decembro terá lugar un acto de presentación do Clúster Audiovisual Galego, no marco da 23ª edición do Festival de Cine Internacional de Ourense (OUFF). Durante o encontro, que comezará ás 11:00 horas no Centro Cultural Marcos Valcárcel, o presidente do Clúster, Jorge Algora, exporá distintos proxectos e accións que ten en marcha a entidade en materia de innovación, internacionalización e dinamización do sector audiovisual galego.

Entre o 29 de novembro e o 5 de decembro celebrarase unha nova edición do festival ourensán, que ten como obxectivo promocionar en Galicia o cinema así como darlles visibilidade ás producións galegas. O programa do festival, que conta co apoio da Xunta de Galicia e a colaboración de Agadic, entre outros, inclúe arredor dun cento de títulos, entre longametraxes, curtas e series de televisión, de 17 países distintos, que se proxectarán en sete días. Na Sección Oficial figuran títulos de nove países e tamén destaca porque inclúe catro longametraxes rodadas por mulleres e outras catro óperas primas que vivirán no OUFF a súa estrea en Europa.

Os espazos que acollerán as proxeccións do  OUFF son cinco: o auditorio municipal, o Centro Cultural Marcos Valcárcel, o Cine Clube Padre Feijoo, o Teatro Principal e o Liceo de Ourense.

En canto aos galardóns desta edición, o festival entregará o Calpurnia de Honra ao socio do Clúster Audiovisual Xavier Bermúdez, xornalista, director e guionista ourensán que traballou en títulos que se poderán ver durante o festival. Ademais o actor Luís Tosar, que cumpre vinte anos de carreira como intérprete, recibirá o Premio Ourense o 30 de novembro, día no que tamén se proxectará a película de Daniel Guzmán na que actúa, “A cambio de nada”. A actriz Mabel Rivera recibirá o premio AISGE a toda a traxectoria.

Programación da 23ª edición do OUFF

Ficción Producciones e Portocabo participan no mercado Content London 2018 e integran a delegación empresarial promovida polo Clúster Audiovisual Galego

As compañías Ficción Producciones e Portocabo participarán esta semana en Content London 2018, o mercado de coprodución de series e contidos para televisión que arranca mañá, martes, na cidade londinense. Ambas produtoras integran a delegación do audiovisual galego neste foro, que foi promovida polo Clúster Audiovisual Galego. 

Desta maneira, o Clúster facilita a presenza de profesionais no mercado de coprodución e relatorios sobre series de TV, Content London que se celebra do 27 ao 30 de novembro en Londres. 

Esta acción enmárcase dentro do Programa Galicia Exporta Organismos Intermedios, co apoio financeiro do Instituto Galego de Promoción Económica (Igape), a Xunta de Galicia e a Unión Europea.   

Do 27 ao 29 de novembro terá lugar The International Drama Summit, programa centrado en series de ficción que en 2017 contou cun panel sobre o mercado español, mentres que Content Futures e The Unscripted Entertainment Forum ocuparán a xornada do venres 30 de novembro.

Content London converteuse nun encontro imprescindible para a coprodución europea de televisión. Os empresarios máis importantes do sector en todo o mundo reúnense arredor de conferencias e screenings, realidade que xera un networking imprescindible para os produtores galegos que queiran internacionalizar a súa empresa pola vía da coprodución internacional para TV. 


“Dhogs”, gran vencedora do Festival Internacional de Cine de Almería con tres galardóns

A película “Dhogs”, ópera prima do director Andrés Goteira producida pola socia do Clúster Audiovisual Galego Gaitafilmes, proclamouse como a gran vencedora da decimosétima edición do Festival Internacional de Cine de Almería (Fical), ao conseguir tres dos galardóns do Certame “Ópera Prima”: mellor interpretación masculina para Carlos Blanco, mellor dirección para Andrés Goteira e segunda mellor película.

A outra triunfadora da noite foi “Carmen y Lola”, a ópera prima de Arantxa Echevarría que pasou polo pitching do Clúster Audiovisual “I+P Ideas para producir” e que narra a historia de amor entre dúas mulleres de etnia xitana, rompeu os moldes e fíxose con dous dos galardóns en xogo, entre eles o de mellor película do Certame “Ópera Prima”.

O director de “Dhogs”, rodada en Galicia e Almería, foi recoñecido polo seu primeiro traballo tralas cámaras. Unha proposta arriscada, diferente e con impronta persoal. Goteira recolleu o seu galardón cun "¡guau!" e agradecendo "un recoñecemento que dá máis gañas de seguir rodando en Almería".